كود سبور//

كاتسبق مشاركة منتخب الكاميرون فـ كاس أفريقيا “المغرب2025” اللي غادي تبدا يوم 21 من هاد ديسمبر، أزمة حقيقية بطلها الاتحاد الكاميرون لكرة القدم برئاسة صامويل إيتو ووزارة الرياضة الكاميرونية.

وبعدما أعلن الاتحاد الكاميروني لكرة القدم قبل أيام عن اقالة المدرب البلجيكي مارك بريس من تدريب منتخب الكاميرون، وتعيين المدرب الكاميروني دافيد باگي فـ بلاصتو، وإعلان الأخير على لائحة المنتخب المشاركة فـ كأس افريقيا 2025، خرج المدرب البلجيكي مارك بريس (المقال حسب الاتحاد الكاميرني)، واعلن على اللائحة ديالو حتى هو باش يشارك منتخب الكاميرون فـ الكان، وحسب جريدة Actu Cameroun فـ المدرب البلجيكي موجد خطة وبرنامج إعدادي باش الكاميرون يكونو واجدين للبطولة الأفريقية.

مارك بريس عندو عقد مع وزارة الرياضة الكاميرونية، وكايتعتبر راسو مازال مدرب لمنتخب الكاميرون، واخا الاتحاد الكاميروني لكرة القدم برئاسة صامويل إيتو اعلنو الإقالة ديالو السيمانا اللي فاتت، ولكن هو مازال شاد فـ البوسط ديالو وكايقول ان الكونطرا عندو مع وزارة الرياضة الكاميرونية اللي قالو له والو، وهذا الشي كايزيد يبين ان المنتخب الكاميروني المتوج بكاس افريقيا خمسة مرات، غادي يجي يشارك فـ هاد النسخة بالمغرب فـ واحد الوضع كلو تطاحنات داخلية بين مكونات كرة القدم والرياضة الكاميرونية، الأمر اللي يقدر يؤثر على اللاعبين ومستواهم فـ البطولة، كيفما اثر عليهم باش ما تأهلوش لمونديال 2026، وما قدروش حتى يتأهلو من الملحق الافريقي.