كود الرباط///
نايضة قربالة فحزب الاستقلال من نهار الخميس ملي خرجات التعيينات ديال مجلس الحكومة للمناصب العليا.
واحد الاستقلالية عينوها مديرة ديال مديرية المرأة بوزارة التضامن والادماج الاجتماعي والاسرة، دايرة سكوندال وسط الاستقلاليين وبزاف ديال الاستقلاليين طيحوا من عبد الواحد الفاسي اللي كيخدم بالعاطفة بلا قياس أو مقدرش يقاوم ضغوط راجلها اللي كيتعتابر واحد من صحابو القراب وهو ضغط على الوزيرة بنحيى اللي دارت زلة غادة تبقى ليها فمسارها الحكومي.
الانتقادات اللي خرجات على هاذ التعيين ماشي حيث اللي تعينات مرا. أبدا القضية فيها الكفاءة ومصداقية التعيين. كيفاش وحدة دخلات للوظيفة العمومية من الشرجم حيث عمرها مكانت خدامة حتى دخلات لديوان مزور، ومن بعدها توظفات وشوية يتعطاها منصب كبر منها، وعندو واحد الثقل خاصة بالنسبة لقضايا النساء. وكاين اللي كيدافع عليها حيث دكتورة ولكن مقدارينش يهضرو على كيفاش خذات الدكتوراة.
حتى صحابها اللي بغاو يدافعو عليها مقدروش ويلاه لقاو فالسيفي ديالها مسارها فمنظمة فتيات الانبعاث اللي دارت يامات شباط وجمعها فيها الكيحل كاع العيالات والشابات العاطلات عن العمل باش يبقاو يديرو بهم التعبئة فالمعارك الحزبية ومن بعد ما بقى عندها تا دور.
هاذ المسؤولة الجديدة مازال معندهاش تا عامين فالوظيفة …يلاه هاذي شي عام شوية باش توظفات وصدقات ليها من الزنقة للديوان ومن الديوان للوظيفة للمسؤولية بزاف رغم ان فالحزب بزاف ديال النسا اللي قادات وعندهم الكفاءة والشواهد والتجارب الوظيفية.
واش هاكا حزب الاستقلال باغي يربح المعارك المقبلة وهو متورط فتكريس الرادة فالمناصب والوظائف العمومية، واش كيتعاقد هاذ الأسلوب غيحقق لنزار الحلم ديالو باش يكون رئيس حكومة المونديال واخا حزب الاستقلال منجح حتى فشي ملف ولا شي ورش من الماء للصناعة والتجارة ولا للنقل وزايدها بإغراق المناصب العليا بالاتباع ديالو على حساب الكفاءة والأهلية.
واش نزار متعلمش الدرس من تعيين صاحبو كاتب عام ديال وزارة التعليم واللي شعل فيها العافية من مور عاصفة النظام الأساسي قبل ميصحح برادة الخطأ ديالو وطيرو باش رجع السلم للوزارة.
