كود سبور//

نايضة فالوداد الرياضي، بسبب البعثة ديال الفريق اللي رسلها رئيس النادي هشام آيت منا لميريكان باش تشارك فكاس العالم للأندية.

وكشفت مصادر “گود” أن التعربيز ديال هشام أيت منا فالتسيير بدا كايخلق انقسامات داخل النادي والأكثر من هذا بين أعضاء المكتب المسير، واللي زاد شعل العافية هي الناس اللي صيفطهم مع البعثة د الفريق اليوم الثلاثاء لميريكان، واللي على راسها 2 هما علي الوزاني وأمين الشيباني وفهاد البعثة كاين 53 واحد، فيهم 4 الموظفين ومشاو غير حيث محسوبين على آيت منا ومنهم المكلفة بالتواصل اللي أصلا الخدمة ديالها ضعيفة وماشي فالمستوى.

وراه آيت منا ما مشاش معهم، وباغي يمشي مع ولدو وعائلتو، وهاذ الشي سعيد الناصيري الرئيس الأسبق للنادي اللي هو الأكثر تتويجا بالألقاب وعمرو ما دا معاه عائلتو لشي بطولة مشاركين فيها الوداد، وفبلاصت ما يصيفط آيت منا نائب الرئيس ديالو كمال الديساوي مع البعثة ما صيفطوش، وهذا الشي حيث ولد الديساوي منخرط معارض لآيت منا، وحتى الناطق الرسمي محمد طلال ما مشاش مع البعثة ودارو لهم طيارة يوم 16 أي قبل يومين من بداية المونديال، وآيت منا غادي بناس عمرهم كان عندهم شي مساهمة فتأهل للوداد لكاس العالم للأندية، وغادي بوحدين غير باش يرضي الخواطر.

نفس المصادر، قالت إن المكتب المديري للوداد الرياضي، كايغلي حيث حتى التصويرة الرسمية ديال الفريق فاش غايمشي لمونديال الأندية ما كانوش فيها أعضاء من المكتب المديري للنادي، ولهذا ساخطين عليه المسيرين فالمكتب المديري وكاعيين على هشام ايت منا، واللي مزيد صحابو القدام ودايرهم فالواجهة والمسيرين الحقيقيين مهمشهم.