وكالات //

نائب محافظ بمجلس الأمة في الكويت ناض بلا حشمة بلا حيا وطلب من السلطات باش تمنع العيالات من ممارسة اليوكَا، حيت هي أمر “خطير ودخيل”، حسب كلامو.

وفعلا منعات وزارة الداخلية الكويتية جلسة يوكَا نسائية بناء على طلب و”مبررات” هاد النائب.

الناشطات النسويات والمثقفات ماعجبهمش الحال وكعاو بزاف بسباب هاد المنع و أيضا ضد كلام المسؤول النيابي ودارو  وقفة احتجاجية قدام مقر مجلس الأمة الكويتي.

المشاركات في الوقفة قالو أنهم كيرفضو باش الحكومة والبرلمان يتاجرو فقضايا العيالات وكيرفضو ممارسة الوصاية على المرا، وهي حرة دير الأنشطة اللي بغات وكيفما بغات.

ومعروف أن الكويت مجتمع منفتح نسبيا أكثر مقارنة مع باقي دول الخليج لكن تيارات الإسلام السياسيمزال عندها وجود و تأثير قوي أيضا ومرة مرة كيبان شي عجب بحال تصريحات هاد النائب.