كود سبور//

كشفت جريدة The Objective الإسبانية، بناء على معلومات من الجامعة الملكية الإسبانية لكرة القدم، ان الصبليون خسرت تنظيم نهائي مونديال 2030، وان المغرب هو اللي غادي ينظمو فتيران الحسن الثاني الجديد فكازا بقدرة استعابية حوالي 115 ألف متفرج كأكبر تيران فالعالم.

وحسب الجريدة الإسبانية، فاستضافة إسبانيا لفينال مونديال 2030، ولى شي حاجة بعيدة المنال فعليا، وقالت ان هذا هو الواقع دابا بعدما كان هذا الشي شكوك.

ووضحت الجريدة ان المغرب عرف كيفاش يدير الأوراق ديالو ودق على البيبان المناسبة فالوقت المزيان باش يضمن دعم مجلس الاتحاد الدولي لكرة القدم لاستضافة نهائي مونديال 2026، وان هادي ضربة قاصحة معنويا لإسبانيا وحتى ماليا.

الجريدة الإسبانية قالت، ان المغرب عارف مزيان شنو كايدير وخدام بطريقة محترفة وعندو تفوق على إسبانيا داخل المجلس التنفيذي للاتحاد الدولي لكرة القدم الفيفا من خلال عضوية فوزي لقجع رئيس الجامعة الملكية المغربية لكرة القدم، عكس الصبليون اللي ما عندهمش عضوية فكونگريس الفيفا، ومعتمدين على عضوية بريطانيا والمجر ممثلي أوروبا باش يدافعو عليها.

نفس المصدر وضح ان نايضة قربالة بسبب هذا الشي داخل الجامعة الملكية الإسبانية لكرة القدم، والمكتب الحالي كايتهم المكتب السابق بالتقصير فخدمتو فهاد الملف، فالوقت اللي دخل فيه رئيس الحكومة الإسبانية بيدرو سانشيز على الخط، وكايحاول توحيد الجهود، وانهم باغيين يدعمو تيران “كامب نو” ديال البارصا اللي فيه طاقة استعابية كاتوصل لـ105 آلاف متفرج، لمنافسة تيران الحسن الثاني الجديد فكازا، اللي صافي غادي لتنظيم نهائي مونديال 2030، بعد فشل تيران سنتياگو بيرنابيو ديال ريال مدريد انه ينافس التيران المغربي.