كود سبور//

نايضة فالصبليون بسببب حادث طرد البرازيلي فينيسيوس جونيور نجم ريال مدريد من مباراة الفريق ضد فالنسيا البارح الجمعة ضمن مؤجل الدورة 12 من بطولة اسبانيا.

وكشفت جريدة “ماركا” الإسبانية، ان ريال مدريد غاضبين بسبب تعرض فينيسيوس جونيور للطرد فالدقيقة 79 من الماتش ضد فالينسيا، ووضحت الجريدة أن النادي الملكي ساخطين على حكم المباراة سوتو جيرادو، وعلى حكم الـVar مونييز رويز بسبب طرد فينيسيوس، معتبرين أن حارس مرمى فالينسا ديميتريفسكي بإستفزاز اللاعبين ديالهم والمبالغة في السقوط وان ضرب فينيسيوس للگول لوجهو جا كرد فعل منو على داكشي اللي دار الحارس يعدما استفزو وجرو من التوني.

ووضحت “ماركا” أن ريال مدريد غايطعنو فالطرد اللي تلقاه فينيسيوس جونيور، وانه كانت الهضرة على عقوبة محتملة بالتوقيف لمدة 4 الماتشات على الاقل، حسب المادة 103، حيث هذا النوع من الأخطاء يتطلب التوقيف ما بين 4 و 12 ماتش، وحسب هذه المادة ففينيسيوس غايتوقف لمدة 4 الماتشات كأدنى عقوبة، وهذا الشي غايخليه ما يلعبش فالسوبر الإسباني.

ولكن وحسب الجريدة “الإسبانية”، فإحتمال العقوبة المذكورة مستبعد حاليا، وان فينيسيوس غايتعاقب لمدة 2 ماتشات فقط، حيث الفعل اللي دار فينيسيوس ينطبق على الحالات اللي ما يمكنش للاعب يلعب الكورة، داكشي علاش العقوبة غاتكون التوقيف 2 ماتشات على الاقل حسب المادة 121 من قانون الانضباط.

وقالت “ماركا” ايضا كاينين عدد من الأدلة لصالح ريال مدريد فالطعن اللي غايدير النادي من بينها مطالبة حكم المبارة باستئناف اللعب قبل العودة للـVar و الضربة اللي وجهها حارس فالينسا لفينيسيوس وهذا الشي كامل غايخدمو به ريال مدريد لتخفيف العقوبة على الاقل على اللاعب ديالهم باش يشارك فكاس السوبر الاسباني.