گود سبور//

نايضة فالرجاء الرياضي، بسبب طلب الكريدي اللي دفعاتو إدارة النادي برئاسة جواد الزيات باش تسلف من البنك، بعد توقيع اتفاقية الشراكة مع مرسى ماروك.

وحسب مصادر رجاوية، فالگروب ديال منخرطين الرجاء الرياضي فتطبيق واتساب، ناضت فيه، والمنخرطين ديال النادي كايحتجو على الخطوة اللي دار جواد الزيات بطلب كريدي من البنك بقيمة حوالي 4 المليار سنتيم، مباشرة بعد توقيع الاتفاقية مع مرسى ماروك، باش يفك مشاكل النزاعات وليشارج د الفريق.

واستغربو منخرطين الرجاء الرياضي من خطورة الزيات باش أنه يطلب كريدي من البنك، وهو اللي كان فوقت الحملة الانتخابية للترشح لرئاسة الرجا، كايقول أن عندو محتضنين وكانو معاه شي وحدين فاللائحة كيقولو أنهم غادي يوفرو السيولة المالية لغاية تفعيل الاتفاقية مع مرسى ماروك.

المنخرطين ديال الرجاء الرياضي كاعيين بزاف على جواد زيات والمكتب ديالو، وكايطالبوهم باش يخرجو بتوضيح ويشرحو لهم وبسرعة علاش مشى هو والمكتب ديالو طلبو هذا الكريدي، واشناهيا الإضافة ديال أعضاء المكتب إلى ماغاديش اقدرو يوفرو موارد مالية بينما تمت المصادقة على الاتفاقية وتفعيلها، وكايسولو كون دابا مرسى ماروك تراجعت عن الاستثمار فالنادي شنو كان غايكون مصير الرجا.