كود سبور//

يعيش الرجاء الرياضي، تحت رئاسة عادل هالا أزمة حقيقة، وواحدة من أسوء المراحل في تاريخ النادي، وزاد الوضع تكفس بعد قرار رحيل حارس مرمى الفريق أنس الزنيتي اللي كايتعتبر من ركائز الفريق ولمدة تقريبا 10 سنين، والرحيل ديالو ممكن يكون تمهيد لرحيل لاعبين اخرين عندهم وزنهم فالفريق.

مكونات الرجاء الرياضي مصدومة بقرار اتفاق عادل هالا مع انس الزنيتي على الرحيل من الفريق، والطريقة اللي خرج بها اللاعب من الرجا، خصوصا وانه يعتبر من الأسماء اللي كتبت إسمها من ذهب في تاريخ الخضرا، وحملت عادل هالا المسؤولية فيما وصل له وضع بطل المغرب.

ووضحت مصادر مطلعة، أن البيت الرجاوية فيه غليان من الداخل بسبب قرار الانفصال عن انس الزنيتي، وأعضاء داخل المكتب المديري للنادي بريوسهم مصدومين من هذا الحدث اللي طاح عليهم فجأة، وكاين فيهم اللي ما فراسو والو فقضية الزنيتي حتى تفاجأ بها البارح بالليل، واعتبرو ان الرئيس منفرد بالتسيير وعدد من الحوايج مخبيهم عليهم، وان الوضع ما بقاش كايتحمل كثر وكاين فيهم اللي قرر الاستقالة من المكتب المديري، وطالبو الرئيس عادل هالا بالاستقالة من المنصب ديالو والإعلان عن جمع عام استثنائي.

ومن شأن قرار أنس الزنيتي الانفصال عن الرجاء الرياضي، يفتح المجال للاعبين اخرين باش يطالبو حتى هما الرحيل ديالهم عن النادي، حيث هو الكابيتان ديال الفريق اللي مفروض فيه يكون آخر واحد يمشي ويخلي الفريق فهاد الظروف، مع العلم ان لاعبين اخرين حتى هما وجّهوا إنذارات للنادي ومطالبين بمستحقاتهم، وهذا الشي مدخل الرجا فواحد المرحلة مجهولة التداعيات ديالها والمستقبل ديال النادي ولى كايبان ضبابي.