كود سبور//

نايضة فالجزائر بسبب مدرب المنتخب الجزائري لأقل من 20 عام ياسين مانع، اللي ناض كيصرفق فلاعبين المنتخب الجزائري ملي سالا الماتش ديالهم الودي مع تونس.

وتصدم الرأي العام الجزائري وهو كيشوف مدرب منتخب أقل من 20 عام، وهو كيضرب فاللاعبين بعد نهاية الماتش ضد تونس اللي سالا بخسارة لالجيري، وبدا كيصرفق فيهوم فالتيران.

وحسب وسائل إعلام جزائرية فالمدرب ياسين مانع دخل للتيران وبدا كيصرفق فلاعبين المنتخب ديالو حيث تشادو مع اللاعبين التوانسة ملي سالا الماتش وضاربو معهم، وهو تدخل وضار فاللاعبين ديالو وعاقبهم بالتصرفيق.

الجزائريين فمواقع التواصل الاجتماعي غاضبين من المدرب ياسين مانع، وكيعتبرو الضرب ديالو للاعبين ما عندوش مبرر، وأنه خاصو يتعاقب وعلى الأقل يجريو عليه من تدريب منتخب أقل من 20 عام، والأكثر من هذا خايفين يتسبب هذا الشي اللي دار فنفور المواهب الجزائرية صغيرة السن فأوروبا من أنها تلعب للجزائر.