كود سبور//

نايض الصداع على الدولي المغربي السابق مهدي بنعطية المدير الرياضي ديال أولمبيك مارسيليا الفرنسي، وهذا الشي حيث حضر مع ولادو فينال دوري أبطال أوروبا البارح السبت بين باريس سان جيرمان الفرنسي (غريم مارسيليا) وأنتر ميلان الطالياني.

جمهور أولمبيك مارسيليا سلط الغضب ديالو فمواقع التواصل الاجتماعي على مهدي بنعطية، وهذا الشي خلى المدير الرياضي ديال فريق جنوب فرنسا يخرج يتراد مع المشجعين فتطبيق X، بحال ملي قال لواحد: “عندي ولادي بغاو يحضرو فينال دوري أبطال أوروبا.. شنو المشكل ديالك انت؟”.

غضب جمهور أولمبيك مارسليا غير ما كايزيد على مواقع التواصل الاجتماعي بسبب هذا الشي، وولاو كيطالبو برحيل مهدي بنعطية من النادي.

للإشارة فجمهور أولمبيك مارسليا ما مسروطش له أن باريس سان جيرمان الغريم ديالهم ربح دوري أبطال أوروبا، حيث 32 عام وهما كايفتاخرو أنهم النادي الوحيد ففرنسا اللي عندو هذا اللقب، واللي كانو ربحوه عام 1993.