كود -وكالات//

اليوم السبت خرجو عشرات الآلاف فمدريد ومدن أخرى كيحتجو على غلاء السكن وعمليات الإفراغ، فواحد من أكبر المشاكل لي كتواجه حكومة بيدرو سانشيز .

فالوقت اللي كانت المسيرات كتدوز من مدريد، بقاو كتر من 100 ناشط  معتصمين فـ”بويرتا ديل سول”.

بنك إسبانيا كيقدر الخصاص فالسكن ب 700 ألف مسكن، أما جمعيات المستأجرين كتحمل الاستثمار العقاري والكرا السياحي جزء من مسؤولية تقليص العرض، خصوصاً فالمدن اللي فيها الطلب كبير.

فمدينة فالنسيا البوليس استعمل القرطاس د الميكا (rubber bullets) والكريموجين باش يفرقو المتظاهرين.

https://x.com/FonsiLoaiza/status/2106410632429838783

هاد الصداع بدا من السيمانة اللي فات فاش تدخل البوليس بالهراوات فمدريد باش يفرغو بالقوة شقة ديال سيدة كبيرة عندها 87 عام .

فالبرلمان، سانشيز خدا ضربة أخرى بعدما فشلات الحكومة دوز جوج مراسيم مرتبطين بالسكن، حيث الحزب الشعبي و”فوكس” و”جونتس” صوتو ضدهم.

هاد الهزيمة السياسية لسانشيز فالبرلمان خلات وسائل الإعلام الإسبانية تتوقع باللي رئيس الحكومة غايطلب انتخابات بكري،خصوصا أن المعارضة طالباتو يستقل حيت مبقاش عندو الدعم لا فالبرلمان ولا فالزنقة.

جمعيات ونقابات الكرايا علنات باللي الخطوة الجاية هي التنسيق مع المركزيات النقابية لإعلان إضراب عام فقطاع السكن، باش يوقفوا الحركة فالبلاد كاملة حتى يفرضوا نقص تمن فالكرا وتجميد عمليات الإفراغ.