كود – وكالات//

أكدات باكستان باللي قصّفات مدن كابول وقندهار وباكتيكا فأفغانستان، وحسب مسؤول حكومي هاد الشي جا كردّ على هجمات ساقبة. هاد التطور جا مورا إعلان ديال الجنود ديالها فهجوم دارتو طالبان الأفغانية على طول الحدود المشتركة بين البلدين.

الرئيس الباكستاني علي زرداري كتب فموقع “إكس” باللي الرد كان كامل مكمول وقال: “لي كيحساب ليه السلام ديالنا ضعف، غادي يلقا رد قوي، وما غادي حتى واحد يفلت من لي كيخططو”، وزاد قال باللي باكستان عارفة فين كاينين لي كيخططو للعنف ولي كيسهّلوه، وهددهم بالعواقب.

الناطق باسم رئيس الحكومة قال باللي لحد الساعة تقتلو 133 عنصر من طالبان الأفغانية وتجرحو أكثر من 200، ولكن طالبان ردّات وقالت باللي ما تقاس حتى شي حد فالغارات الأخيرة.

باكستان قالت باللي دمّرات 27 موقع عسكري تابع لطالبان، وسيطرات على 9 مواقع آخرين، ودمّرات كثر من 80 دبابة ومدفعية وناقلات جنود .

وزير الدفاع الباكستاني خواجة قال بلي هادي “حرب مفتوحة” ضد حكومة طالبان، وقال باللي صبر باكستان سالا، ودابا الحرب بيناتهم محلولة، وقال باللي بلادو حاولات تحافظ على الهدوء عبر قنوات مباشرة ومع دول صديقة، ولكن ما بقاتش صابرة.

كان وقف إطلاق نار هش فشهر أكتوبر، ولكن المعارك بقات كتوقع من بعد.

آخر جولة ديال الغارات الباكستانية جات من بعد تفجيرات انتحارية، من بينها هجوم على مسجد شيعي فباكستان خلّى أكثر من 40 قتيل، وتبنّاه تنظيم الدولة الإسلامي، وحتى “ولاية خراسان” التابعة للتنظيم أعلنت مسؤوليتها على تفجير فمطعم فكابول الشهر لي فات.