گود سبور//

عرف الجمع العام ديال اتحاد طنجة لكرة القدم، شوهة كبيرة وتبادل للاتهامات.

حسب ما عاينت “كود” ان المتسبب الرئيسي ديال الفوضى للي عرفها الجمع العام ديال اتحاد طنجة هو باشا طنجة، هشام صنيب، للي كان مصمم باش يفرض لجنة مؤقتة لتسيير الفريق برئاسة نصر الله كرطيط، للي فنفس الوقت رئيس شركة اتحاد طنجة، وعضو فالمكتب الجامعي.

هاد الباشا عطى ميساجات لبعض المنخرطين باللي الوالي التازي باغي كرطيط يترأس لجنة مؤقتة لتسيير الفريق، وهاد شي للي شعل الجمع العام ودفع الاغلبية الساحقة ديال المنخرطين باش يرفضو التعليمات.

التصرفات البليدة ديال باشا طنجة تسببت فبلوكاج ديال الجمع العام لأزيد من أربع ساعات، ومن بعد ما دار اتصالات هاتفية مع شي جهة، ومن بعد ما تأكد باللي مستحيل يفرض كرطيط رئيس ديال اللجنة المؤقتة، حيث المنخرطين رفضو شي مرشح كيقول انه عندو دعم من لفوق، خضع هاد الباشا للأمر الواقع ليتم الاتفاق على تشكيل لجنة مصغرة مكونة من عبد الحنين الغرافي وحكيم شريف مهمتها تنحصر في الدعوة لجمع عام مقبل قصد انتخاب رئيس جديد للفريق وفقا للقوانين والشكليات الجاري بها العمل.

نفس المعطيات للي توصلت ليها كود، كاتقول أن نصر الله كرطيط استغل العضوية ديالو فالمكتب الجامعي وسوق راسو ان عندو الضوء الأخضر من لقجع باش يتكلف بتسيير الاتحاد، وان عندو الدعم المطلق من عند الوالي التازي، لكن المنخرطين كان عندهوم رأي آخر.

المنخرطين كانوا فاهمين خطة كرطيط للي كان مصر يترأس لجنة مؤقتة لتسيير الاتحاد باش يبقى مدير شركة الفريق، ورفض يترشح مباشرة للرئاسة حيث كاين تنافي بين رئيس الجمعية ومدير الشركة، ولذلك كان شبه إجماع ديال المنخرطين باش ينسفو خطة كرطيط.

للتذكير ان نصر الله كرطيط هو منعش عقاري معروف فطنجة، وكان ضمن الأسماء للي سمعت ليهوم الفرقة الوطنية بخصوص الابحاث والتحقيقات للي كتديرها على مصادر الأموال للي كيمولوا بيها المشاريع ديالهوم.

للإشارة وكما كان منتظر، تم طي صفحة محمد الشرقاوي للي علن استقالتو من رئاسة الفريق، بعد الانتقادات الكبيرة للي توجهت ليه من طرف المنخرطين بسبب العشوائية في تدبير شؤون الفريق، وللي غطات على الإنجاز للي كانت تحقق فموسم 23/22، وللي تعرف بالريمونتادا التاريخية.