كود سبور//
كشف ناصر لارگيط المدير التقني السابق للجامعة الملكية المغربية لكرة القدم، كيفاش تم إقناع النجم المغربي أشرف حكيمي باش يلعب مع المنتخب الوطني المغربي فبلاصة الصبليون، وكيفاش كانت نص ساعة كافية فهاد الشي.
وهضر ناصر لارگيط فحوار مع جريدة “ليكيب” الفرنسية على طريقة إقناع أشرف حكيمي باللعب مع المغرب، وقال: “قررت نمشي نشوفو فمدريد مع الأب ديالو ووكيلين إسبانيين ديالو. ودرنا اجتماع فواحد لوطيل، وقلت له إلى اختاريتي اسبانيا راه غاتبقى ديما مغربي وديما أول من غايشجعوك، وإلى اختاريتي المغرب راه غانكون فرحانين بزاف”.
وكمل ناصر لارگيط وقال: “قلت له غانعطيك نص ساعة باش تفكر مع من غاتلعب، حيث خاصني نهضر مع لاعب آخر فلوطيل، وملي رجعت عندو، قاليا هذا الشي مزيان، هذا راه المغرب”.
وكمل ناصر لارگيط وقال: “قلت لحكيمي إلى مديتي يديك ليا راه هاذ الشي غايكون قوى من عقد، وهو يقوليا راه غانتقاتل بكل ما عندي، وقلت له راه ما نضمن لك والو، ولكن بالإمكانيات ديالك والخدمة غاتلعب فالمنتخب المغربي.