نجوى المالحي-كود//

غادي تحتاضن مدينة الدار البيضاء مهرجان ’’الفن‘‘ لي غيجمع فنانين كبار من المغرب وخارجه فثلاثة أمسيات فنية غير مسبوقة من 3 حتى 5 أكتوبر 2024 فحديقة ’’فيلودروم‘‘.

هاد المهرجان غادي يكون فرصة للجمهور باش يستمتع ببرنامج غني ومتنوع، تحت شعار ’’الموسيقى، الكوميديا، والتضامن‘‘، وغا يتنظم من طرف شركة ’’فن برودكشن‘‘ بشراكة مع جمعية قرى الأطفال.

المهرجان غادي يضم ثلاثة ليالي كل وحدة كتتميز بعالم فني مختلف:

ليلة الأساطير اللي غادي تكون نهار 3 أكتوبر، غادي يجتمع فيها الشاب خالد وفرقة ناس الغيوان على نفس المسرح لأول مرة من بعد أكثر من عشر سنين. هاد الليلة غادي تكون تكريم للإرث الموسيقي الإفريقي والعربي، وغادي تنقل الجمهور في رحلة عبر إيقاعات خالدة تمزج ما بين فن الراي والموسيقى التراثية المغربية.

الليلة الثانية نهار 4 أكتوبر، غادي تكون مخصصة للكوميديا، وغادي تجمع ألمع نجوم الكوميديا بحال بودر، ياسر، جمال الشلاج، نونورس، ويونس ديبارديو. هاد الليلة غادي تكون مخصصة للضحك والمرح، وغادي تكون فرصة للجمهور باش يعيش أجواء ممتعة مليئة بالمرح.

أما الليلة الثالثة والختامية نهار 5 أكتوبر، غادي تكون ليلة شرقية بامتياز، حيث غادي يلتقي فيها نجوم الموسيقى العربية أحمد سعد وجوزيف عطية، اللي غادي يقدموا عرض فني متميز من الإيقاعات الشرقية.

إلى جانب العروض الفنية، هاد المهرجان غادي يتميز بالتزامه الإنساني. جزء من مداخيل المهرجان غادي يمشي لدعم جمعية قرى الأطفال المغرب، اللي كتخدم من أجل الأطفال اللي ماعندهمش عائلات، فإطار مبادرة إنسانية كتسعى لتعزيز روح التضامن والمشاركة. من خلال شعار “استمع إلى الصوت وتبرع”، غادي يساهم المهرجان فدعم هاد الجمعية، ويعزز الأثر الاجتماعي ديال هاد الحدث، اللي كيرمز لالتزامه بدعم القضايا الاجتماعية المهمة، وكيعتمد على الثقافة كوسيلة للتضامن.

بالإضافة للعروض الفنية، المهرجان غادي يقدم تجربة متميزة للزوار من خلال قرية ترفيهية غادي تتواجد فمدخل حديقة “فيلودروم”، وغادي تحتوي على بزاف ديال الأنشطة بحال أكشاك الطعام، عروض موسيقية، وفضاءات استرخاء مخصصة للعائلات، باش يقضيو أوقات ممتعة قبل بداية كل سهرة.

التذاكر ديال كل أمسية متوفرة للبيع فالموقع الإلكتروني Guichet.ma، وكذلك بنقاط البيع مثل ميغاراما، موروكو مول، فيلودروم الدار البيضاء، وميغا مول فالرباط. هاد المهرجان اللي من المنتظر أنه يجمع مختلف الأجيال والعائلات، كيطمح أنه يكون موعد سنوي كيبان من خلالو تنوع موسيقي والتزام اجتماعي حقيقي.