كود ــ مراكش//

جدد نادي قضاة المغرب النداء ديالو للجهات المختصة باش تنصف القضاة مادّيا ومعنويا، خصوصا ف ظل الضغط الكبير اللي كيعانيو منو داخل المحاكم، واللي حسب النادي ولى كيتجاوز بكثير الإمكانيات البشرية واللوجستيكية المتوفرة.

النادي بعد اجتماع المكتب التنفيذي ديالو في الويكاند بمراكش ركز على ثلاثة نقاط كبرى: وضعية القضاة، مشروع رقمنة المحاكم، والإعداد لتقرير شامل حول منظومة العدالة خلال 2024 و2025.

وأبرز النادي واحد المعطى خطير وهو أن المغرب فيه غير حوالي 4600 قاضٍ، وكيتكلفو سنويا بأكثر من 5 ملايين ملف!

هاد الأرقام كتأكد حجم الضغط المهني الكبير، وكتبرز أن الأعباء لي على كاهل القضاة ’’مضنية بزاف وكتحتاج تقدير وتحفيز يتماشى مع المسؤوليات اللي كيتحملوها‘‘.

النادي رجع كذلك للملف المادي، بحيث ذكر أن الأجور ما عرفات حتى مراجعة محفزة من 2013، وطالب بتحسين الظروف المادية للقضاة باش يضمنو العيش الكريم والمكانة اللي كيستحقّوها داخل المنظومة القضائية.

ومن جهة أخرى، دعا النادي إلى تعزيز الحماية القضائية للقضاة خلال أداء مهامهم، خصوصا ضد الاعتداءات أو الضغوطات المعنوية اللي كيواجهوها، مؤكدا أن “هيبة القضاء هي جزء من هيبة الدولة، وأي مساس بها كيهدّد سيادة القانون”.

وبالنسبة للتطبيق المعلوماتي “ساج 2” اللي كيتعلق بتضمين الأحكام والوثائق القضائية، قال النادي بأنه منخرط فمشروع الرقمنة، غير أنه ذكر بوجود صعوبات تقنية وتنظيمية كتعرقل هاد الورش، وطالب بزيادة التنسيق بين جميع الأطراف باش يتم تجاوز هاد الإشكالات.

النادي ذكر كذلك بأنه سبق وصدرات توصية من المجلس الوطني حول هاد الموضوع، وأن المكتب التنفيذي راسل رسميا المجلس الأعلى للسلطة القضائية لمناقشة المشاكل اللي كيعاني منها المشروع الرقمي.

الأرقام اللي كشف عليها نادي قضاة المغرب كترفع الصوت بقوة: 4600 قاضٍ فقط أمام ما يفوق 5 ملايين ملف! وهاد الوضع كيخلي الإصلاح، والتحفيز، والحماية أمور ما بقاتش اختيار… بل ضرورة عاجلة.