گود سبور//

أكد التونسي نصر الدين نابي مدرب الجيش الملكي أن المنافسة على لقب البطولة الاحترافية مازال ما تحسم واخا ربح الوداد الرياضي فالكلاسيكو ضمن الدورة 25 من البطولة، وتقريبا الواك هو الفريق الكبير اللي كان باقي متبقي له من الفرق اللي يقدرو يكونو عقبة فوجهو، وواخا بعد ولو مؤقتا على الرجاء الرياضي المطارد له بـ7 النقاط، فكيشوف ان حتى حاجة ما تحسمت، وقال بلي ليفار كيلعبو كل ماتش بحالا لاعبين فينال كيفما كان الخصم كبير ولا صغير.

وهضر نصر الدين نابي مدرب الجيش الملكي على الرباح اللي حقق الفريق على الوداد فالكلاسيكو بنتيجة واحد لزيرو، وقال: “ربحنا فريق عريق من أكبر الفرق الافريقية، ولو انه كيدوز من وضع صعيب دابا وحنا احتارمناهم، واخا كنا متخوفين من توقف البطولة فالأيام اللي فاتت ولمدة شهر، وهذا الشي كنا خايفين منو، وفماتش اليوم قدرنا نخرجو رابحين 3 بوان واخا الصعوبات اللي واجهنا فاخر المباراة”.

وجاوب نصر الدين نابي مدرب ليفار ميكرو “گود” على سؤال “واش البطولة بدات كتحسم شويا بشويا للجيش الملكي بعد الرباح على الوداد؟” وقال: “لا اخويا مازال، وحنا كنعتابرو أن كل ماتش كنلعبوه ومن بداية الموسم انه فينال، ولعبنا نهائي اليوم ضد الوداد ومازال عندنا نهائي ضد المغرب الفاسي، والسوالم، وكلشي غنلعبو ضدهم بعقيلة الفينال، حيث گاع الماتشات صعاب، وما كاينش شي فريق ساهل، وحنا واجدين ومرحبا بالضغط وبكل توضع راه حنا واللاعبين جاهزين واخا كاينين صعوبات،  راكم شفتو الاصابات اليوم، ولكن كنتعاملو مع كل الظروف الصعبة وحنا دورنا كطاقم تقني نلقاو الحلول وما نتشكاوش،  وما نتخباوش ورا المبررات”.