أسماء غربي :كود//

علمت “كود” أن جوج مواطنين صرحو فمحضر للبوليس الجمعة لي فات، بلي نائب رئيس مجلس عمالة الرباط، تعدا عليهم بالضرب والسب والشتم، بعدما وقف فطريق ومبغاش يخليهم يدوزو بسياراتهم بالقرب من البرلمان.

وحسب معطيات “كود”، البوليس دارو محضر للواقعة لي تورط فيها نائب رئيس مجلس عمالة الرباط، يوم الجمعة 16 دجنبر، وفيها كاع المعطيات لي صرحو بها المشتكين ضد المستشار الجماعي.

وحسب معلومات “كود” تضمن المحضر ادعاء المستشار الجماعي بقربه من رئيس الحكومة وأن لديه نفوذ.

وكشف مصدر حزبي داخل التجمع الوطني للأحرار، أن قيادة الحمامة غاضبا بزاف على هاد المستشار لي كيدعي أمور واهية، وأنها كترفض التصرف لي دار.

ودخل مصطفى بايتاس، الناطق الرسمي باسم الحكومة على الخط، بحيث شدد حسب مصدر حزبي تحدث لـ”كود”، أنه كيرفض هادشي وكيتضامن مع الضحايا لي تضررو من الحادثة.

الفضيحة أن هاد المستشار لي سميتو هشام أقمحي، حط طوموبيل لي تابعة للدولة، فواحد البلاصة أنتيردي ممنوعة. وقبالة وزارة العدل وبالقرب من الاإدارة العامة للأمن الوطني.

ورغم هادشي كامل مشا كيطلب السماحة من الضحايا لي تعدا عليهم بالسب والشتم حسب مصادر “كود”.