گود سبور//

قرر الگول ديال السنغال إدوارد ماندي اللي خلق جدل كبير بالفوطة ديالو فكأس إفريقيا “المغرب2025″، يحبس اللعب مع منتخب بلادو السنغال.

واعلن إدوارد ميندي اليوم الاحد الاعتزال الدولي، ودار حد الكاريير ديالو مع منتخب السنغال، اللي ربح معه كأس إفريقيا 2021، وحقق معه المركز الثاني فكأس إفريقيا 2025.

إدوارد ميندي كان حتى هو من أبرز اللاعبين الخباث فمنتخب السنغال، فكأس إفريقيا 2025، وكان كايدير واحد الفوطة حدا البوطو ديالو، باش يشتت بها انتباه المنافسين، على أنها فيها سحر وشعوذة باش ما يتماركاش عليه البيت، وتشهر بها فالفينال أمام المنتخب المغربي، والواقعة ملي اللاعبين المغربيين إسماعيل الصايباري وأشرف حكيمي حيدو له الفوطة من حدا البوطو هما والرماسورا ديال الكواري اللي كانو فالتيران، ولكن للأسف بهاذ التصرف طاحو فالفخ وتعاقبو اللاعبين بالتوقيف على اللعب والغرامة من طرف الكاف، وتعاقبت الجامعة الملكية المغربية لكرة القدم بالغرامة بسبب الرماسورا.