كود سبور//

عبر ليونيل ميسي على الاستغراب ديالو بسبب الأحداث اللي عرفها ماتش المنتخب الأرجنتيني الأولمبي أمام المنتخب المغربي، والتوقف لأكثر من ساعتين واستئناف المباراة بعدها برفض هدف التعادل للأرجنتين ورباح المغرب بنتيجة 2 لواحد.

أسطورة الأرجنتين ليونيل ميسي اللي منعو الفريق ديالو أنتر ميامي المريكاني من المشاركة مع الأرجنتين فالأولمبياد، تفاعل مع خسارة منتخب بلادو أمام المغرب، وحط سطوري فأنستغرام قال فيه: “العجب”.

وكانت غاتعرف دورة الألعاب الأولمبية باريس 2024، فضيحة كبيرة كن سالا ماتش المغرب والأرجنتين بنتيجة التعادل جوج لجوج، فماتش زاد فيه الحكم السويدي اللي لعب المباراة 15 دقيقة كوقت بدل ضائع.

وبمجرد استئناف الماتش لمدة 3 دقائق، بعدما توقف حيث شي مشجعين نزلو للتيران ملي تماركا الهدف الثاني ديال الأرجنيتن، حيد الفار الهدف بداعي التسلل، وسالات المباراة برباح المغرب بنتيجة 2 لواحد.