گود سبور//

كايبان أن الأسطورة الأرجنتينية ليونيل ميسي بطل العالم 2022 مع الأرجنتين، قرب يعلق الصباط، ويدير نهاية للمسار ديالو الدولي الحافل بالإنجازات في كرة القدم ويعتزل، وموحال يلعب كاس العالم 2026، الصيف المقبل فالميريكان وكندا والميكسيك.

ليونيل ميسي لاعب انتر ميامي الميريكاني لعب الليلة الماضية مع الأرجنتين ضد فنزويلا، وقاد المنتخب الأرجنتيني لتحقيق الرباح ضمن إقصائيات كاس العالم، فماتش تلعب فتيران “لمونيمونتال” بالأرجنتين، وماركا 2 بيوتا من أصل 3 الأهداف ربحو بهم الماتش.

وأكد ميسي مول 38 عام، في تصريح له أن إنهاء المسار ديالو مع الأرجنتين فبلادو كان حلم ديما كيحلم به، وقال من بعد الماتش: “عشت بزاف من اللحظات فهاد التيران ودابا كانحقق واحد من الأحلام ديالي وهو نودع شعبي، عطاني جمهور البارسا الدعم الكبير ديما ولسنوات طويلة، وكان حلمي نحس بهذا الشي حتى هنا فبلادي وها هو هذا تحقق”.

وبخصوص المشاركة ديالو مع الأرجنتين فكاس العالم المقبلة، وضح ميسي أنه مازال ما حسم القرار ديالو فهاد الشي، غايشوف الحالة البدنية فهاد الشهورا اللي جايين، قبل ما يقرر، وقال إن المنطقي هو أنه ما غاديش يشارك بسبب العمر، ولكن ما غاديش يسد الباب وإلى حس براسو مزيان بدنيا غايلعب المونديال أما إلى كان العكس راه ما غاديش يلعب كاس العالم.