كود سبور//

وجه أسطورة ألعاب القوى المغربي سفيان البقالي ميساج للجماهير المغربية باش يتكايسو على الرياضيين المغاربة حيث ما ربحوش ميداليات فأولمبياد باريس2024، وأكد ان الرياضي كايديرو مجهودهم ولكن النتائج ماشي كاتجي غير هاكاك، ولكن خاصها خدمة على المدى الطويل، وضرب المثل براسو وقال انه ماشي غير جا وربح اليوم ذهبية أولمبياد باريس.

وهضر سفيان البقالي بعد بعدما ربح الميدالية الذهبية فسباق 3000 متر موانع فأولمبياد باريس، وقال فتصريح له: “كانشكر گاع الرياضيين المغاربة اللي شجعوني سوا اللي معنا هنا او الرياضيين والأبطال السابقين”.

وكمل البقالي: “كانوجه رسالتي ما خاصناش نحقدو على الابطال المغاربة راه الرياضيين كايديرو اللي عليهم وكيديرو تداريب والنتائج ماشي ساهلة وماشي حتى نجيو هنا عاد نبغيو النتائج حيث هذا الشي كايبغي نخدمو عليه على المدى الطويل والبعيد، وانا ماشي جيت اليوم ووليت بطل أولمبي راه من 2020 وأنا طامح باش نبقى رافع مشعل هذه المسافة ونبقى نربح”.

وختم بطل أولمبياد باريس2024 وقبل منو أولمبياد طوكيو2020، وقال: “كانشكر الجماهير المغربية كاملين على الرسائل ديالهم فمواقع التواصل الاجتماعي وراني كانشوف كلشي ولكن ما يمكنش ليا نجاوب حيث كنت مركز على الهدف ديالي وقدرت نربح وشكرا المغاربة كاملين والواليدة والوليد بلا بكم من ندير حتى شي حاجة”.