الرئيسية > آراء > ميساج لسعيد الناصري: مزيان دوز من اليوتوب باش تروج اعمالك ! ولكن ماشي بالضرورة تسب التلفزة حيت تانتا كنتي كاتغمس فالمرقة ديالها شحال هادي ! هضرتك اليوم ماعندها مصداقية
13/03/2019 17:00 آراء

ميساج لسعيد الناصري: مزيان دوز من اليوتوب باش تروج اعمالك ! ولكن ماشي بالضرورة تسب التلفزة حيت تانتا كنتي كاتغمس فالمرقة ديالها شحال هادي ! هضرتك اليوم ماعندها مصداقية

ميساج لسعيد الناصري: مزيان دوز من اليوتوب باش تروج اعمالك ! ولكن ماشي بالضرورة تسب التلفزة حيت تانتا كنتي كاتغمس فالمرقة ديالها شحال هادي ! هضرتك اليوم ماعندها مصداقية

سهام البارودي – كود//

ماشي ضروري تسب التلفزة و الناس القائمين عليها حيت ماكايقبلوش الأعمال ديالك ! حيت كاين احتمال انه الاعمال ديالك تكون عيانة  او لا ؟ كاتشوف الأعمال ديالك واعرة ! خارقة للعادة ! احسن من الاعمال الاخرى ؟ باش و بأي معيار و شكون نتا ؟ حيت لاكنتي نتا لي كاتشكر اعمالك راه كاينطابق عليك المثل المغربي لي كايقول ” شكون شكرك آ العروسة ! مي و خالتي و البلحاسة دجارتي”

علاش فاش كنتي كاتغمس فگاميلة التلفزة ماكانوش ناس خايبين ؟ تا تراو عليك عاد نايض كاتسب فيهم ؟ هادشي راه كايخليك انسان ماعندو مصداقية.

الأعمال ديال سعيد الناصري معروفة ! انا شخصيا من نهار عقلت عليه كايمثل و هوا ماكايخرجش على شخصية ” ولد الدرب” الدرويش الشهم الحازق لي كاتزعط فيه شي بوگوصة ( انا و خويا و مراتو، ولد الدرب، البانضية، عبدو عند الموحدين، الخطاف، سارة، الحمالة و زيد و زيد ) ! وواخا كبر سعيد الناصري و شابو نواضرو و ركب الفم و كرشو دلات ! مازال مصر يمثل شخصية الشاب الفقير الشهم لي كاتزعط فيه شي بنت بوگوصة (غالبا لاباس عليها).

ديما عندو ديك الازدواجية ديال الحازق / لي لاباس عليه ! و ديما كايصور الحازقين على انهم رجال واعرين و ناس طيبين و لي لاباس عليهم انتهازيين حگارة و شفارة ( كروش الحرام).

كليشيات فكليشيات ! الكليشي ديال النسيبة ! الكليشي ديال الحازق ! الكليشي ديال لي لاباس عليه ! الكليشي ديال العروبي ! المديني ! أعمال عامرة بالكليشيات البايتة ! و قصص كاتطرا غير فالافلام المصرية القدييييييييمة و افلام سعيد الناصري و مسلسلاته.

هادشي علاش مايمكنش ليك تبغي تبان كفنان كايحارب الردائة ! حيت انا شخصيا كمتفرجة كبرات معاك و تفرجات ليك فأغلب انتاجاتك الفنية سواءا فالسينيما او التلفزة غاتسمح ليا بالزربة نقوليك بلي تاهي عندها نصيب من الرداءة! و بلي كاينين كوميديين شباب اليوم احسن ! و عندهم منتوج فني احسن و ولاد الوقت قدرو يخرجو من دوك الكليشيات لي حبستي راسك فيهم. ثم من هادشي كلو مايمكنش تحتاكر التلفزة ! انا عن نفسي شفتك بما يكفي فالتلفزة ! خاص وحدين اخرين يبانو ! La relève آ سي الناصري !

ايه مافيها باش تلونصي شين ديالك فيوتوب ! و مزيان بزاف لي فكرتي باش ماتبقاش عوال على التلفزة و على فلوس دافعي الضرائب باش تنتج أعمالك! و لكن ماتزيدش فيه فويخرات و ماتلبسش شخصية سبارطاكيس محرر العبيد بديك الهضرة ديال آجيو نديرو شين ديالنا ! و آجيو آ خوتي تفرجو فيا حيت لاخرين خيخي ! و تبغي تركب على ” المقاطعة” !

مشكل الكوميديا معروف فالمغرب ! في ظل غياب امكانية الحديث عن الثالوت المقدس ( السياسة، الدين و الجنس) راه كايبقا ليكم داك شوية ديال الكليشيات باش ضحكو بيها ( عروبي/ مديني، حازق/ لاباس عليه ، فاسي/ عروبي….)

لوح الاعمال ديالك ! و خلي المتفرج يحكم و يقول شكون لي احسن واش نتا و لا الآخرين !

موضوعات أخرى