گود سبور//

خالق المنتخب الوطني المغربي لأقل من 20 عام، واللي الدراري اللي كايلعبو فيه كلهم من ولاد ما يعرف بـ “جيلZ”، وهو الجيل اللي تزاد فـ عصر الانترنيت والفيسبوك وغيرها من وسائل الديجيتال، (خالق) الحدث بعدما قدر يتأهل لدومي فينال كاس العالم 2025، برباح كبير على الميريكان بنتيجة 3-1، فـ ربع النهائي، وهذا الشي قدر يبين أن ما يعرف بـ “جيلZ” إلى خدم وتوفرت له الظروف قادر يبين حنت يديه ويساهم فـ تطور المغرب، ماشي غير يبقى عاطيها للاحتجاجات، اللي حتى هي كاتبقى مشروعة ما دام ان مطالبهم هي إصلاح قطاعات الصحة والتعليم وخلق فرص شغل، غير خاصهم يردو البال من شي عدميين إسلاميين وشي وحدين ديال اليسار الراديكالي اللي تخشاو وسط منهم وكايحالو يظلمو صورة لبلاد فـ عينين الشبات والشبان.

جيلZ ديال المنتخب الوطني المغربي، وبعدما ربحو الميريكان وتأهلو لثاني مرة فـ تاريخ الكورة المغربية لدومي فينال المونديال، بعد اول انجاز اللي كان مع جيلY فـ مونديال الشباب عام 2005، عطاو صورة أخرى على Genz، واحتفلو مع الجماهير المغربية، وهداو لها هذا الإنجاز وهداو للملك محمد السادس وعبرو على رغبتهم باش يكملو وما يحبسوش فـ الدومي فينال ديال البطولة المقامة حاليا بدولة الشيلي.

عثمان معمّا كبيتان المنتخب الوطني المغربي لأقل من 20 عام، وواحد من أحسن اللاعبين حاليا فـ ليكيب ناسيونال وفـ المونديال، هضر وقال فـ تصريح للموقع الرسمي للجامعة الملكية المغربية لكرة القدم: “بينا الوجه الحقيقي ديال المغرب ونتمنى المغاربة يكونو فرحانين وفخورين بينا، ودابا غانركزو على الدومي فينال باش نفرحو بالتأهل للفينال كيفما فرحنا اليوم”.

مدرب المنتخب المغربي، محمد وهبي حتى عبر على الفرحة ديالو والفخر بهاد اللاعبين ديال جيلZ اللي مثلين المغرب فـ مونديال الشباب، وهضر وقال: “شكرا لسيدنا وللشعب المغربي على دعمهم لنا، وحنا فرحانين وفخورين باللعابا والتأهل لدومي فينال للمونديال وما باغيينش نحبسو هنا”.

لاعبين المنتخب المغربي لأقل من 20 مباريات عام، بهذا الإنجاز اللي دارو وردود الأفعال ديالهم من بعد الماتش وطريقة الفرحة ديالهم، بينو أنهم كايبغيو لبلاد سوا اللي تزادو منهم فـ المغرب وكبرو فيه أو اللي تزادو وكبرو على برا، وأنهم باغيين يعطيو للبلاد ويديرو شي حاجة على قبلها، وهذا ميساج لشي عدميين تزرعو وسط بنات وولاد “جيلZ” اللي كايخرجو مدة هادي فـ الاحتجاجات، واللي كاينشرو شي شعارات عدمية بحال “ما بغيناش الكورة وما بغيناش كاس افريقيا والمونديال”، ومخبيين وسط الشباب اللي كايطالبو بـ “الصحة والتعليم وفرص الشغل”، فـ بلاصة ما يوجهوهم لفتح نقاش جاد على “كيفاش مسؤول بحال فوزي لقجع رئيس الجامعة الملكية المغربية لكرة القدم نجح فـ الكورة المغربية وتطورات معها المنتخبات الوطني والبنية التحتية من ملاعب وغيرها، ومسؤولين اخرين فاشلين بحال لوزير مهدي بنسعيد اللي فاشل وما قدرش يكون هو كوزير شباب صلة وصل بين جيلZ والحكومة”.