الوالي الزاز -كود- العيون////

[email protected]

أشرف السفير الفرنسي المعتمد لدى المملكة المغربية، كريستوف لوكورتيي، رفقة والي جهة العيون الساقية الحمراء، عبد السلام بكرات، ومنتخبي المنطقة، على افتتاح أول مركز للخدمات القنصلية لفرنسا على مستوى الأقاليم الجنوبية للمملكة بمدينة العيون.

افتتاح مركز الخدمات القنصلية الفرنسية بمدينة العيون كأول مركز فالمنطقة وماشي أي دولة راه دولة فالاتحاد الأوروبي وعضو دائم بمجلس الأمن الدولي، فيه بزاف ديال لي ميساجات سواء منها السياسية أو حتى التي تشمل الظرفية الحالية للمنطقة ولنزاع الصحراء.

افتتاح مركز الخدمات القنصلية ديال فرنسا فمدينة العيون كيعني بزاف، كيعني أن فرنسا مُصرة على الدفاع عن الوحدة الترابية للمملكة المغربية، بحيث ما خداتش وقت كبير باش تجاهر بموقفها الصريح الداعم لمغربية الصحرا وميدانيا ماشي غير أقوال، وهادشي على الرغم من الضغوط الممارسة عليها، لاسيما من الدزاير اللي العلاقات معاها خدات أبعاد كبيرة بعد الاعتراف الفرنسي بمغربية الصحراء.

افتتاح هاد المركز ديال الخدمات القنصلية فالعيون عاصمة الأقاليم الجنوبية للمملكة كان فيه أيضا ميساج يؤكد أن فرنسا العضو الدائم بمجلس الأمن منخرطة فالدينامية ديال الوحدة الترابية للمملكة المغربية التي يقودها الملك محمد السادس لأبعد الحدود، وأنه فعلا يمكن التعويل فالمحطات اللي كيعيش وغادي يعيش النزاع بدون ما دير حساب لأي ردة فعل كانت لأن قرارها سيادي ويعنيها.

افتتاح هاد المركز كيعني أيضا أن فرنسا منخرطة فتنمية المنطقة وتتفاعل بالإيجاب معاها بعيد على النزاع السياسي، وبينات أنها مقتانعة بمقاربة المغرب القاضية بالتنمية السوسيو اقتصادية فأرضو والتنمية ديال الإنسان فالمنطقة بعيد على المسار السياسي ديال هاد النزاع المفتعل، وأيضا بغات تقول لينا إن المغرب واحد من شماله إلى جنوبه ونفس هاد المركز ونفس هاد الخدمات التي ستُقدم فالأقاليم الجنوبية تُقدم أيضا فأكادير وكازا ومدن شمال المملكة.

فرنسا أيضا عطاتنا موقف صريح ومباشر من خلال هاد الافتتاح على تركيزها حتى على البُعد الإنساني والثقافي فالمنطقة، إذ تسعى من خلال هاد المركز لتعزيز الروابط مع المنطقة، وهادشي ديجا شفناه فإعطاء انطلاقة “الأليانس” ديال العيون ووضع الحجر الأساس للمقر ديالو فزيارة سابقة ديال رئيس مجلس الشيوخ الفرنسي للعيون.