وكالات//

واحد الشاب ميريكاني من فلوريدا لقا راسو فمشكلة كبيرة، بعدما وُجهات ليه تهم كثيرة على قتلو لـ13 تمساح بطريقة مخالفة للقانون.

السلطات قالت بلّي جاكوب لاتريل، اللي عندو 21 عام، جمع معاه واحد الفرقة صغيرة وركبو فـ قارب هوائي فـ نهر سانت جونز، وكان كيقودهم فالصيد ديال التماسيح بالليل، غير بمصباح صغير كيهدي الطريق.

ووفقاً لتقرير رسمي من لجنة الحفاظ على الأسماك والحياة البرية فـ فلوريدا، لاتريل خرق بزاف ديال القوانين اللي كتنظم صيد التماسيح، بحال أنه صد أكثر من العدد المسموح بيه، وفـ وقت خارج الموسم، وزيد عليها ما كانش عندو لا تصريح لا والو.

فلوريدا كتعطي الحق للناس يصيدو غير جوج تماسيح فـ العام، ما بين 15 غشت و1 نونبر، وبشرط يكون عندهم تصريح رسمي، اللي كيتكلف 272 دولار لسكان الولاية، و1022 دولار للناس اللي ماشي من فلوريدا.

الاتهامات اللي تلاحات عليه جات على أساس صور وفيديوهات توثق الجولات الليلية، اللي باين فيها لاتريل ومعاه الناس آخرين، مع تماسيح، بعضهم ميت ومجمد فوق الثلج فالقارب.

تشدو جاكوب لاتريل نهار 22 شتنبر، ومن بعد خرج بكفالة ديال 6500 دولار.