كود – عثمان الشرقي//

متبعي الشأن الفني ديال الأغنية الأمازيغية والشعبية تصدمو من التحول المفاجئ اللي دارت الفنانة الاستعراضية، الشيخة أسمهان، المعروفة بلقب “مولات الضحكة”، أسمهان قررات تقلب الصفحة بصفة نهائية مع الفنان عبد العزيز أحوزار، مورا واحد الخلاف اللي شعل العافية بيناتهم وخلاها تنسحب من وسط عرس قبل ما تاخد حقها فالغرامة.

النقطة اللي فيضات الكاس بدات من واحد الحفل خاص، فين احوزار واسمهان تزايدو فالهضرة، و قدام هاد الموقف، أسمهان “مولات الضحكة” مقبلاتش “الحكرة”، وهزات راسها وخرجات من العرس، و بعدات من الفرقة بصفة نهائية،
سمهان ماسكتاش بحال الشيخة مريم، وإنما قالت فتدوينة: “الله ياخد الحق فلي كيحگر الوليات”، وهي رسالة مشفرة وقاصحة دارت بوم فالسوشيال ميديا.

مورا هاد الصدمة والانسحاب السريع، أسمهان دارت واحد الوقفة تأملية قصيرة  باش تبرد الغدايد، وتقاد سيفي ديالها، وتشوف فين غتزيد بالمسيرة الفنية ،هاد التوقف كان كيبان بحال الهدوء اللي كيسبق العاصفة، فالوقت اللي بزاف ديال المتتبعين صحاب ليهم باللي أسمهان غتغبر على الساحة كانت هي كتوجد لضربة غتقلب بها الموازين الفنية.

اسمهان من بعد ،علنات على التحقاتها بشكل رسمي بالفنان مصطفى أومكيل ،هاد الانتقال جا فوقتو ومحسوب بالتدقيق، أسمهان مشوماتش غير شي أيام قبل ما تهز موزونها وتلتحق  بالفنان أومكيل، اللي رجع للساحة بـ”النيولوك” فمحاولة باش واكب الموجة الفنية.

هاظغ الالتحاق ديال أسمهان جا مع الخطة الجديدة والذكية اللي دايرها الفنان مصطفى أومكيل باش يرجع المنصات تدريجيا، حيت أومكيل مبقاش كلاسيكي وجدد الشيخات ديال الفرقة، وبدل المظهر البصري واللباس ديال الفريق ديالو فوق المنصة باش يعطي لمسة عصرية للأغنية الأمازيغية.

الاستراتيجية الجديدة ديال أومكيل لقات حاجتها فأسمهان، حيت النخوة ديالها فالشطح والضحكة  غتكون هي اللمسة اللي غاتكمل اللوحة الفنية الجديدة، ودابا، مع الدخلة ديال أسمهان بشطحاتها الموزونة والحماسية، أكيد غادي تزيد تساهم بشكل كبير فأنها تعطي سحر خاص لسهرات ومهرجانات مصطفى أومكيل، واللي غنشوفو واش بهاد الانتقال يقدر يفرض راسو قدام أحوزار ولحسن الخنيفري.