كمال لمريني – كود وجدة //

كشف حزب الاستقلال ف مدينة وجدة، اليوم الإثنين، عن أسماء المرشحين اللي غايدخل بيهم غمار الاستحقاقات التشريعية الجاية على مستوى الجهة الشرقية، ف حين كايراهن على أنه يكتاسح هاد الانتخابات ويجيب 8 ديال المقاعد، أي بمعدل مقعد برلماني ف كل إقليم بهاد الجهة، بحكم أنه، حسب متتبعين للشأن المحلي،  غايدخل ببرنامج انتخابي متميز.

وذكرت مصادر من داخل حزب الاستقلال ل”كَود”، أن حزب “الميزان”، رشح عمر أحجيرة ف دائرة وجدة أنكَاد، وياسين دغو فإقليم جرادة، و محمد الطيبي ف دائرة الناظور، وعبد الحكيم بنعبد الله ف بركان، إدريس جدي ف تاوريرت، علي الجغافي ف كَرسيف، فضلا عن ترشيح عبد المنعيم الفتاحي.

وأضافت المصادر ذاتها، أن “حزب الاستقلال كايراهن أنه يجيب 8 ديال المقاعد ف الجهة الشرقية وماغادي يزكَل تاشي إقليم، بحكم أن البرنامج الانتخابي ديالو، اللي شارك في إعداده 150 خبير من حزب علال الفاسي، مقنع”، حسب المصادر نفسها.

وكايتضمن برنامج حزب الاستقلال مجموعة ديال النقط، أبرزها، إنقاذ المنطقة الشرقية من التهميش، وتقليص الفوارق الاجتماعية ومعدلات البطالة وجلب الاستثمارات.