كود الناظور //

بعدما كانت فالبداية خرجات هضرة على أن حزب التجمع الوطني للأحرار عطى تزكية للترشح بجماعة الناظور لأحد الشباب، اختار الحزب بشكل رسمي رئيس المجلس الإقليمي فالناظور، سعيد الرحموني، وكيلا للائحة “الحمامة” في الانتخابات الجماعية القادمة.

جا هاد الاختيار، بعد اللقاء اللي عقداتو قيادات من حزب الأحرار، واللي كان حاضر فيه محمد أوجار المنسق الجهوي للحزب بالجهة الشرقية، وهشام الصغير، رئيس مجلس عمالة وجدة، وعبد القادر سلامة عضو المكتب السياسي.

وكان الرحموني منسقا لحزب الحركة الشعبية فالناظور، ولكن بسباب الصراعات الكبيرة اللي كاتعيشها “السبولة” فالمنطقة، قرر أنه يمشي للتجمع الوطني للأحرار، اللي يبدو أنه راسم خريطة باغي يتصدر بها المشهد السياسي كيفما تصدر انتخابات الغرف المهنية.