كود الرباط//

ميثاق الأخلاقيات مرون الأحزاب، كولشي كيقلب على الصيغة المناسبة باش يتم إدراجها داخل قوانين الأحزاب أو تكون ميثاق شرف سياسي بين جميع الأحزاب وتكون ملزمة قانونيا سواء فالترشيح للانتخابات الجماعية أو البرلمانية وحتى المسؤوليات التنظيمية داخل الأحزاب.

النقاش حول الأخلاقيات تجبد وسط زعماء الأغلبية، بحيث اقترح حزب الأصالة والمعاصرة يكون توقيع مشترك بين أحزاب الأغلبية وتعطي صورة مزيانة على الأغلبية بلي كتبادر وكتفاعل مع رسالة سيدنا لي عطات توجيهات صارمة للفاعل السياسي باش تكون مدونة أخلاقيات ملزمة قانونيا.

حزب الاستقلال خدا نفس مسار البام، بحيث حتى فرض شرط التخليق في تشكيل عضوية اللجنة التنفيذية، إضافة الى شرط جوح ولايات فالمجلس الوطني.

وحسب مصادر “گود” فإن ضمن 107 مرشح للي دافع طلب العضوية فاللجنة التنفيذية كاينين 30 واحد معندهومش شروط، بحيث أن 77 غاتبقا مرشحة عندهم شروط.

نزار بركة فاجتماع اللجنة التنفيذية السابقة، قبل يومين، لمح لهم بلي لي عندو شي ملف قضائي بلا ميترشح وينسحب.

بركة دبا عندو الحق يقدم لائحة من 30 عضوا للجنة التنفيذية باش يصادق عليها المجلس الوطني مرة واحدة.

بخلاصة الاحزاب كتوجد حتى هي بنية تنظيمية كتوازي استعدادات المملكة لتنظيم المونديال، عبر وضع ميثاق “المونديال السياسي” واللي غايمنع صحاب الوسخ والفاسدين من الترشح لمناصب المسؤولية.