الرئيسية > تبركيك > مونية لمكيمل فحوار مع “كود”: حسن الفد قامة كبيرة وغنبقى دائما ممتنة لفرصة اشتغالي معاه.. وحنا محتاجين لإنتاجات على طول السنة تخلق للفنانين فرص شغل
16/05/2021 20:00 تبركيك

مونية لمكيمل فحوار مع “كود”: حسن الفد قامة كبيرة وغنبقى دائما ممتنة لفرصة اشتغالي معاه.. وحنا محتاجين لإنتاجات على طول السنة تخلق للفنانين فرص شغل

مونية لمكيمل فحوار مع “كود”: حسن الفد قامة كبيرة وغنبقى دائما ممتنة لفرصة اشتغالي معاه.. وحنا محتاجين لإنتاجات على طول السنة تخلق للفنانين فرص شغل

عفراء علوي محمدي- كود//

الفنانة مونية لمكيمل، اللي دخلات قلوب المغاربة هذ رمضان من خلال سلسلة “الفد تيفي”، عبرات على سعادتها وفرحتها بالاشتغال للسنة الثانية إلى جانب حسن الفد.

وأشادت لمكيمل، فحوارها مع “كود”، بغزارة الإنتاجات الرمضانية هذ العام، وتمنات أن الإنتاج يكون العام الجاي مضوبل، باش يتخلقو فرص شغل لفنانين موهوبين ومهمشين.

كيفاش كانت تجربتك مع حسن الفد للعام الثاني؟

الاشتغال سنتين على التوالي مع الفنان الكبير حسن الفد هي تجربة جميلة بزاف، هذي فرصة كيحلمو بيها كَاع الممثلين حيت ما شاء الله عليه قامة فنية كبيرة جدا فالمغرب، وحنا كنفتخرو بيه، فكانت تجربة زوينة تعلمت منها الشيء الكثير، واللي بفضلها المغاربة تعرفو على مونية لمكيمل، وتلقيت حب كبير بزاف من عند الجمهور. غنبقى دائما ممتنة لفرصة الاشتغال مع السي حسن.

واش ممكن للجمهور يعاود يشوفك فأدوار البطولة بعد هذ التجربة؟

أنا عمري ما كنت كنبحث على الأدوار البطولية بالدرجة اللولى، أنا العشق ديالي هو التمثيل وكنبحث على الأدوار اللي كتجذبني وكثير انتباهي، كيفما كانت مساحتها فالعمل، يعني ماغنقدرش نقليك من هنا لقدام غنولي نقبل غير أدوار البطولة ونرفض الأدوار الثانوية، لا، أنا بالنسبة ليا ماكاينش دور كبير ودور صغير، كاين ممثل كبير وممثل صغير، الله يجعلني نلعب 4 مشاهد فقط، خاصني نلعبهم زوين، ونقدر نلعب 300 ألف مشهد ومانلعهبهمش زوين، مساحة الدور ماشي هي المهمة، بقدر ما شنو كيقدم هذ الدور وسط العمل.

واش تفرجتي فمسلسلات رمضان؟

تفرجت فالمسلسلات اللي اشتغلت فيها هذ العام، بحال “ولاد المرسى”، و”باب البحر”، و”صلا وسلام”، و”الفد تيفي”، تابعت كذلك أعمال زملائي، وسعيدة جدا بغزارة الإنتاجات هذ العام، وكنتمنى هذ العدد يتضوبل ويتريبل العام الجاي، لأنه قد ما كانت عندنا غزارة فالإنتاجات، قد ما كيتخلقو فرص شغل للفنانين، اللي ماغيبقاوش يعانيو من حالة الركود أو يتشكاو من النسيان والتهميش، وحنا محتاجين لإنتاجات على طول السنة وماشي غير فرمضان.

شنو رأيك فإنتاجات رمضان؟

أنا مايمكنش ندير تقييم لزملائي فالعلن، لأن التقييم هو مهمة النقاد، والإشادة بالأعمال هي مهمة الجمهور المغربي، وحتى إلى كانو عندي ملاحظات نقد نقولها بيني وبين صديقي، حيت النصيحة أمام الملأ فضيحة، انا كنفضل إلى كانت ملاحظات بيني وبين زملائي تكون بشكل سري ودي وحميمي، أما فالعلن فممكن تكون مباركة أو كلمة شكر وتقدير.

شنو الجديد ديالك؟

أنا بصدد التجهيز لعملين، مسلسل وفيلم سينمائي، ولكن كنفضل مانعلنش عليهم أنا اللولة، فانتظار الإعلان الرسمي ديال القناة المنتجة وشركة الإنتاج، حيت كاينة الشركات اللي كتبغي تحفظ على الأعمال الفنية ديالها فوقيتة الإعداد، وكاينة اللي كتبغي تعلن، وانا كنحترم هذ البروتوكول.

موضوعات أخرى

18/06/2021 21:19

عاجل.. عمدة الرباط عفا رئيس قسم التعمير ورئيس قسم المراقبة بجماعة ومواجهة جديدة بين الوالي والبي جي دي بسبب فضايح التعمير

18/06/2021 20:30

 لمغاربة مشاو عند اليمين المتطرف الطالياني باش يرد على اليمين المتطرف الصبليوني. سالفيني كيشكر فمجهودات المغرب لمحاربة الهجرة 

18/06/2021 19:30

الفراملية شكاو بالحكومة للبرلمان بسبب الترقية.. وعضو فتنسيقية الممرضين لـ”كود”: غنستمرو فاجتماعاتنا حتى تستجب الوزارة