أميمة عطية – كود كازا ///

قررت شركة ترامواي الدار البيضاء تمديد أوقات الخدمة ديالها، حتا لوحدة صباحاً، باش تسهل عملية تنقل المشجعين من بعد نهاية الماتش اللي غادي يجمع بين المنتخب الوطني ومنتخب البرازيل ضمن منافسات كأس العالم.

هاد القرار جا فإطار الاستعدادات ديال المدينة للتعامل مع الإقبال الكبير المتوقع من الجمهور، خصوصاً من بعد نهاية المقابلة، بهدف ضمان حركة سلسة وآمنة فوسائل النقل العمومي وتفادي الازدحام.

ووضحت الشركة، فبلاغ نشراتو على صفحتها الرسمية فـ”فايسبوك”، أنها غادي تبرمج رحلات إضافية من عدة محطات رئيسية.

بالنسبة للخط الأول، غادي تكون رحلات من محطة ليساسفة على الساعة 00:30 وعلى الساعة 00:40 ليلاً. أما الخط الثاني، فغادي تكون رحلتين من محطة عين الذئاب على الساعة 00:40 وعلى الساعة 00:50.

وبالنسبة لشبكة الباصواي، فحتا هي تبرمجات فيها رحلات إضافية على الساعة 01:00 وعلى الساعة 01:10 صباحاً، باش تبقى الخدمة متوفرة للمواطنين بعد نهاية المقابلة.