گود سبور- فيلاديلفيا//

غايكون عند جمهور الوداد الرياضي اللي جا لمدينة فيلادلفيا الأمريكية لتشجيع الفريق الأحمر فكأس العالم للأندية، خيار مزيان باش يتنقل فالمدينة، هو ميترو الإنفاق اللي كايخدمو به الفيلاديلفيين بزاف.

ومتكون ميترو الإنفاق هنا بفيلادلفيا من شبكة ممتدة على مسافة 40 ميل أي 64 كيلومترا، كاتربط بين 66 محطة، وكايركب فالعربات ديال الميترو فالمدينة كثر من 330 أفق شخصا فاليوم الواحد، وشبكة الميترو هي وسيلة نقل مهمة بزاف بفيلادلفيا هنا بولاية بنسلفانيا الأمريكية، وراه جمهور الوداد يقدر يتنقل فالميترو باش يكتشف المدينة ويمشي حتى لتيران لينكولن فاينانشال ستاديوم اللي ملعوبين فيه جوج ماتشات ديال الوداد الأول الأربعاء 18 يونيو ضد مانشتسر سيتي والأحد 22 يونيو.

وبالنسبة لتاريخ الميترو ديال فيلادلفيا، راه تفتاح نهار 4 مارس 1907، ومكلفة به هيئة جنوب شرق بنسلفانيا (SEPTA)، والميترو ديال فيلادلفيا واحد من أشهر مترو الأنفاق وأكثرها شعبية هنا فالميريكان بعد مترو شيكاگو وبوسطن، ونيويورك.

وبخصوص ثمن رحلة واحد فالميترو 2.25 دولار ميريكاني، وكاينة واحد البلان مزيان هو بطاقة TransPass، صالحة لمدة سيمانا والثمن ديالها 22 دولار. وكاينة بطاقة One Day Convenience Pass  وثمنها 9 دولار وكاتوفر 8 رحلات بالحافلات أو المترو أو الطرام يوم واحد.