كود سبور//

غايخليو موناكو الفرنسي النجم ديالهم المغربي إلياس بن الصغير يلعب مع المنتخب الوطني المغربي الأولمبي، فدورة الألعاب الأولمبية باريس 2024 الصيف الجاي.

ونقلت جريدة “ليكيب” الفرنسية، تصريحات للمدير العام ديال موناكو الفرنسي تياگو سكورو بخصوص إلياس بن الصغير والمشاركة ديالو فأولمبياد باريس 2024، قال فيها إنه غايخليو إلياس بن الصغير يمشي للمنتخب المغربي الأولمبي إذا تم الاستدعاء ديالو من الناخب الوطني المغربي طارق السكتيوي للمشاركة فأولمبياد باريس 2024.

للإشارة فالرئيس الفرنسي إيمانويل ماكرون، كان قال قبل أسابيع أن گاع الأندية الأوروبية خاصها دير بحال الفرق الفرنسية، وتخلي اللاعبين ديالها يشاركو فأولمبياد باريس، بمعنى أن اللاعبين اللي كيلعبو فالبطولة الفرنسية ما غايلقاوش مشاكل مع فرقهم باش يشاركو فأولمبياد باريس، عكس اللاعبين اللي كيلعبو فالأندية الأوروبية الأخرى، حيث الأولمبياد ما داخلش فتواريخ الفيفا، والأندية ما باغينش يطلقو اللاعبين للمنتخبات.