عمر المزين – كود///

شدو البوليس فمراكش ، زوال نهار السبت 17 يناير الجاري، شخص عندو 36 عام، وهو مول طوموبيل كيشد مع تطبيق inDrive، وكيشتبه فتورطو فـنقل الركاب بلا رخصة، وعدم الامتثال لأوامر الشرطة، وتعريض حياة مستعملي الطريق للخطر.

وحسب المعطيات المتوفرة، فالشرطة ضبطات المعني بالأمر وهو فحالة تلبس بنقل الركاب بلا ترخيص، لكن المفاجأة كانت ملي ما امتثلش، وطلع فوق الرصيف، وولات مطاردة خطيرة حيث فرّ فالأتجاه المعاكس بطريقة كتعرض حياة الشرطيين والراجلين والسائقين للخطر.

هاد التصرفات الخطيرة كانت موضوع شريط فيديو تدار بكثرة فمواقع التواصل الاجتماعي، وخلق موجة غضب وسط المواطنين بسبب التهور اللي بان فيه السائق.

التحريات والأبحاث اللي دارتها المصالح الأمنية مكّنات من تحديد هوية المشتبه فيه وتوقيفو، قبل ما يتدار ليه بحث قضائي تحت إشراف النيابة العامة المختصة، من أجل كشف جميع ظروف وملابسات وخلفيات هاد القضية.

وكتجي هاد العملية فإطار المجهودات المتواصلة ديال مصالح الأمن فمراكش للتصدي للنقل السري، وردع كل السلوكات اللي كتهدد السلامة الطرقية وأمن المواطنين.