محمد سقراط – كود//

الصراحة كنت كنتوقع كي العادة أن جوج حوانت غادي يكونوا سادين وواحد حال، هادي هي عادة المغاربة مع الإضرابات، وحتى الى كان شي إضراب ناجح فكتلقاه تقريبا بحال الى صحة، بحال لي كيديرو موالين الطاكسيات ملي كيديرو إضراب وكيبقاو يبراكيو الطاكسيات لي خدامين، وكي دارو موالين الكاميوات، ولكن موالين لحوانت بدلو هاد المفهوم، لدرجة نص يطرو حليب كان خاص نمشي عليه حتى لكارفور، وواحد السوق حدا الدار سد كامل بموالين الدجاج وموالين الزيتون والكزارة والعطارة والمحلابات، فقط موالين الكرارس ديال الخضرا هوما لي كانوا خدامين، إضراب ناجح، والعجيب أنه بلا حتى شي تعبئة واضحة ديال شي تنظيم، غير بالكروبات ديال واتساب والفايسبوك صبح بنادم واقف وقفة رجل واحد ضد الحكومة.

هادشي شفناه فالمقاطعة واخا إتضح أنها كانت ممولة ومدعومة من طرف شي وحدين حسب واحد مكتب الدراسات فشي قنت، ولكن الإمتداد ديالها والصدى لقا إنتشار فالفايسبوك ومجموعات الواتساب، وطبعا الدولة مكايناش تنظيميا فواتساب ومعندها حضور فيه وماعارفاش آش كيطرى فيه “ربما”، وهنا منين ولينا كنشوفو إحتجاجات الجديدة كتبلور وكتقاد وتخرج للواقع وكتضر الحكومة وكتوقف قدامها عاجزة، لأنه ماعندها قادة معامن غادا تهدر أو تبيع وتشري معندها تنظيمات مؤطرة، داكشي عفوي بنادم تقهر وصافي ووللى كيدير أشكال نضالية بلا مايحتاج تأطير منظم.

واحد الفيديو كاين فالفايس ديال الحسن التاني كيهدر فيه على أغنياء المغرب وكيفاش أنهم ناس غير معطائين ومكرهوش كولشي فابور ومكيخلصوش الضريبة، وكنظن أن هاد الوضع السلوكي متغيرش بزاف، لذا راه من الظلم أن واحد عايش محبوس فالحانوت مغامر بحياتو فشي أحياء وداير عليه الكرياج كي الحبس وبلا تغطية صحية والا تقاعد ولا أي حاجة، يزيد يتقيد بقوانين في حين أن مول الفلوس كيتحايل عليها أو مكتفرضش عليه كاع وكيستافد من تسهيلات ضريبية من لفوق، وفي حين أن عمليات النهب فرزق الدولة والمشاريع المتأخرة في كل قنت فالبلاد هي السمة الأساسية حاليا، وفاللخر الدرويش هو لي خاص يخلص هادشي بالضرائب.