الرئيسية > آراء > مول الفوقية ووليداتو ! گاع الفراقي غلباتو ! الحالات كاتزايد و مول الفوقية امسيكين داير هايلالة على صلاة العيد ! هايلالة اصلا مامسوق ليها تاواحد حيت المغاربة مشغولين دابا بالحولي و السفافد و المجامر و العطرية مطحونة و الفاخر باش يحضروا لأجواء العيد التقليدية !
17/07/2021 17:00 آراء

مول الفوقية ووليداتو ! گاع الفراقي غلباتو ! الحالات كاتزايد و مول الفوقية امسيكين داير هايلالة على صلاة العيد ! هايلالة اصلا مامسوق ليها تاواحد حيت المغاربة مشغولين دابا بالحولي و السفافد و المجامر و العطرية مطحونة و الفاخر باش يحضروا لأجواء العيد التقليدية !

مول الفوقية ووليداتو ! گاع الفراقي غلباتو ! الحالات كاتزايد و مول الفوقية امسيكين داير هايلالة على صلاة العيد ! هايلالة اصلا مامسوق ليها تاواحد حيت المغاربة مشغولين دابا بالحولي و السفافد و المجامر و العطرية مطحونة و الفاخر باش يحضروا لأجواء العيد التقليدية !

فحال گاع عشاق الصنادل د الجلد ! مول الفوقية و صحابو كايتخايلو بلي كاين شي مخطط ضد الاسلام و المسلمين الهدف ديالو هوا القضاء عليهم ! و بلي الماسونية كاتستاغل كورونا باش تطبق الخطة الجهنمية الگراندايزرية البوكيمونية التيليتوبيزية للقضاء على الدين و بلي منع صلاة العيد داخل فهاد المخطط الجهنمي لي عاق بيه غا مول الفوقية و صحابو ! واش سمعتي آ الماسونية ؟ صافي راه تفرشتي عاق بيك الديتيگتيڤ مول الفوقية نوضي على سلامتك !

مساليين قبهم هاد الناس ! كايصحابهم راه غير بوحدهم لي مسلمين فالمغرب !
گاع المغاربة مسلمين آ الاخوان !الكسابة لي دابا فالسوق مسلمين و الشناقة مسلمين و الكليان مسلمين !  الاغلبية الساحقة راه سمعو القرار ديال المنع د صلاة العيد و ميكو! تقبلوه بصدر رحب! كاين لي ماتسوقش ليه گاع حيت ماعمرو اركعها !! المسألة مسألة أولويات و بغا مول الفوقية و لا كره المواطن المغربي حاليا مقاتل باش يشري العيد و الحاجة الوحيدة لي يمكن تعكر الفرحة ديالو هي مايلقاش شي حولي مليح بالثمن لي بغا أما الباقي غي روايات! المغربي مشغول دابا كايسول واش كاين شي رخا ؟ و بشحال شرا جارو ؟ و مراتو مقاتلة باش تشري العطرية و السفافد و كايساينو العيد باش يخلقو الاجواء و يشويو بولفاف !و الدراري كايجمعو العواد باش يشوطو الريوس ! العيد الكبير هوا الشوا و بولفاف و الكتف و القطبان مع العائلة نعام آ سيدي ! هذا هوا العيد بالنسبة للاغلبية الساحقة ديال المغاربة و صلاة العيد كانت هوا هاداك ماكانتش هي هاديك راه فاهمين الظروف لي كاتمر بيها البلاد و عندهم الاولوية دابا هي توفير مصاريف العيد و العطلة و موراها الدخول المدرسي و بالنسبة للصلاة، الانسان لي باغي يعبد الله كايعبدو فدارو ! هذا طبعا ماكايعنيش انه المغاربة ماشي روحانيين ! لا المغاربة عندهم جانب روحاني كبير بزاف ولكن ماشي كيما بغا مول الفوقية!

سهام البارودي – كود//

المغاربة واخا سنين ديال محاولة التدعشيش ديالهم وواخا العقلية المحافظة لي عند اغلبهم ولكن فلداخل ديالهم شعب واعي بالاولويات ! شعب كايطبق المقولة ديال شوية لربي شوية لعبدو ! سمع مزيان هاد “شوية لربي” هادي كاتلخص العقلية ديال بزاف ديال الناس ! فاش كايقوليك بنادم ” شوية لربي” راه كايرفض ضمنيا انه يعطي “كلشي لربي” عارف بلي الحياة فيها ربي و فيها “عبدو” فيها الجزء الروحاني و فيها الجزء المادي ! و قابل انه يعطي شوية هنا و شوية لهيه فيفتي فيفتي !

مول الفوقية مسيكين ماكرهش يشوف شي انتفاضة و المظاهرات و الملايين خارجين كايغوتو على صلاة العيد و لكن طبعا هادشي مستحيل حيت الاغلبية ماشي هادي هي الاولوية الحالية ديالو ! يقدر يخرج مول الفوقية ! يخرجو بضعة من صحابو فبعض الاحياء المتفرقة هنا و هناك و لي معروفة بأنها عامرة باللحايا و صحاب قال الله قال الرسول ! ولكن بصفة عامة المغربي مامسوقش و ماعندوش مع هاد المحاولات البهلوانية لإثبات الذات !

مسكين مول الفوقية ! عايش فعالم بوحدو ! كايتألم حيت المغاربة ماكايشبهوش ليه ! مامسوقينش لداكشي لي هوا محروق عليه ! مشغولين بأولويات هوما سطروها لراسهم ! المغربي باغي يعيش مزيان ! ياكل مزيان ! يسكن ! يقري ولادو و يكون عندو باش يداوا ! باسطا ! من غير هادشي راه بالنسبة ليه كلشي دايز !

موضوعات أخرى

27/07/2021 11:30

واش كيهم هادشي المغاربة؟. البرنامج الانتخابي للبي جي دي فيه ثاني فلسطين واخا هوما للي وقعو التطبيع وهضر على تجديد الشراكة مع اسبانيا بحالا مافراسهومش تطورات العلاقات بين مدريد والرباط

27/07/2021 10:30

بلبعاس نائب رئيس حكومة القبايل لـ”كود”: بغينا نفتحو سفارتنا فالصحراء..ونتمنى إجراء لقاءات رسمية مع المسؤولين المغاربة

27/07/2021 10:20

ميركاتو انتخابات 2021 فالصحرا.. رجل الأعمال الصحراوي “حسن الدرهم” مشا من الاتحاد الإشتراكي والتاحق بالأحرار وها فين غادي يترشح

27/07/2021 09:30

مراكشية ماتت مباشرة بعد تلقيحها بفاكسان “جونسون” الميريكاني.. الحادث تسبب ف استنفار صحي فـ المدينة وهاشنو كَال مصدر من وزارة الصحة لـ”كود”