گود سبور//

حلل الأسطورة التشيكية أنتونين بانينكا مبتكر طريقة البنالتي “بانينكا”، علاش النجم المغربي براهيم دياز زكل البنالتي بالبانينكا فالفينال ديال كاس افريقيا بين المغرب والسنغال.

ووضح بانينكا فتصريح نشرو راديو “كادينا” الإسباني، وقال: “راه دوزت عامين وانا كانتدرب يوميا باش نماركي هاديك البانينكا (فالفينال د كاس أروربا 1976 بين تشيكوسلوفاكيا وألمانيا الاتحادية)، شفت فينال كاس افريقيا وانا متأكد بلي براهيم دياز ما تدربش عليها مزيان باش يضربها بهاديك الطريقة، جاتو الفكرة يلعبها غير هاديك الساعة وجربها، وهذا الشي علاش زگلها”.

ومازال الجمهور المغربي ما استوعبش تضييع براهيم دياز للبينالتي فاللحظات الأخيرة من فينال كاس افريقيا بين المغرب والسنغال، ملي ضرب الكورة بالبانينكا خصوصا وان الماتش تقلب والسنغال قدرو يماركيو هدف الرباح فالشوط الاضافي الاول وربحو الكاس.