كود – و م ع//

بتعليمات من الملك محمد السادس، أشرف ولي العهد الأمير مولاي الحسن، اليوم السبت بجماعة إعزانن بإقليم الناظور، على إعطاء انطلاقة عمليات أول محطة للحاويات بميناء الناظور غرب المتوسط، فبداية التشغيل التدريجي لهاد المشروع الضخم اللي وصلات الاستثمارات العمومية والخاصة فيه لـ54 مليار درهم.

المحطة الشرقية، اللي غادي تسيرها مجموعة مكونة من مرسى المغرب وشركة «ترمينال إنفستمنت ليميتد» التابعة لمجموعة «إم إس سي»، رصدات ليها استثمارات بحوالي 5 ملايير درهم، وغادي تتوفر على رصيف بطول 1520 متر، وطاقة استيعابية غاتوصل لـ3.5 ملايين حاوية فالسنة مع حلول 2030.

الميناء غادي يضم حتى محطة ثانية للحاويات، بشراكة بين مرسى المغرب وشركة «سي إم أ سي جي إم»، باستثمارات ديال 3 ملايير درهم، وبطاقة استيعابية إضافية كتبلغ 1.8 مليون حاوية، ومن المرتقب تدخل الخدمة فأبريل 2027، باش توصل الطاقة الإجمالية للميناء لـ5.3 ملايين حاوية.

والمشروع ما غاديش يقتصر غير على الحاويات، بل غادي يضم محطات للبضائع المختلفة والصلبة، وخدمات الشحن بالدحرجة، فضلا على قطب طاقي فيه محطة للغاز الطبيعي المسال بطاقة 5 مليارات متر مكعب، ومحطة للمحروقات بطاقة 25 مليون طن.

وحسب المعطيات المعلنة، هاد المركب الصناعي والمينائي مرشح يخلق 14 ألف منصب شغل مباشر و20 ألف منصب غير مباشر، خصوصا لفائدة الشباب، مع إحداث منصة صناعية ولوجيستية على مساحة 700 هكتار، باستثمارات خاصة كتقدر بـ12 مليار درهم.

ولربط الميناء بمحيطه، غادي يتدار خط سككي على طول 49 كيلومتر بين سلوان والميناء، وطريق سيار بطول 105 كيلومترات انطلاقا من جرسيف.

وكيجي ميناء الناظور غرب المتوسط باش يعزز العرض المينائي ديال المغرب، ويكمل الدينامية اللي خلقها ميناء طنجة المتوسط، مع الرهان على جذب استثمارات جديدة وتقوية موقع المملكة فالتجارة البحرية الدولية، خصوصا بين أوروبا والبحر الأبيض المتوسط والشرق الأوسط وآسيا.