كود سبور//

بان رولاني موكوينا مدرب الوداد الرياضي مصدوم من بعد الخسارة أمام المغرب الفاسي بنتيجة 4 لواحد فتيران العربي الزاولي بالدار البيضاء برسم الدورة 16 من البطولة الاحترافية، واخا أكد أنه هو اللي كايتحمل المسؤولية فهاد الخسران.

وقال رولاني موكوينا مدرب الوداد الرياضي، في تصريح له بعد المباراة: “أول حاجة كانطلب المسامحة من جماهير الوداد وكانعتذر على هذه النتيجة، أنا اللي كانتحمل المسؤولية كاملة وما تلوموش اللاعبين”.

وكمل موكوينا وقال: “غانبقى نتحمل المسؤولية حتى آخر يوم ليا فالوداد، وراني هنا باش نبدل شي حوايج وكانو أخطاء، وكانلوم راسي وغانراجه هذا الشي واللاعبين ما يتلاموش واللي يتلام هو أنا”.

وكان رولاني موكوينا باينة عليه الصدمة بسبب الخسارة أمام المغرب الفاسي بنتيجة 4 لواحد، لدرجة أن الملامح ديال وجهو كانت حزينة بزاف وقال للصحافيين فأخر الندوة الصحافية سمحو ليا حيث ما قدرش يجاوب على الأسئلة ديالهم.