گود سبور//

قرر الجنوب إفريقي رولاني موكوينا مدرب الوداد الرياضي، يبعد من الضغط ديال مواقع التواصل الاجتماعي، ويركز على راسو خلال المرحلة المقبلة، خصوصا وأن الفريق الأحمر مازال منافس على المركز الثاني المؤهل إلى دوري أبطال أفريقيا، واللي فحالة ما تحققش مع نهاية الموسم غايمشي بحالو حسب ما داير معه هشام ايت منا رئيس النادي، إضافة إلى مشاركة الوداد فمونديال الأندية الصيف الجاي فالميريكان.

وخرج رولاني موكوينا مدرب الوداد الرياضي على إنستغرام ديالو وقال: “فالأسابيع المقبلة، غانبعد على وسائل التواصل الاجتماعي باش نبدا فترة التخلص من السموم الرقمية والتركيز، وما غايكونش هذا الشي غير بمثابة تجديد لعقلي وروحي، ولكن غايخليني نركز حتى على المرحلة النهائية ديال أهدافي الحالية”.

وتمنى رولاني موكوينا من المتابعين ديالو يتفهمو هذا القرار ديالو، وشكرهم على الدعم والمساندة اللي كايعطيوه ديما على مواقع التواصل الاجتماعي، وأكد لهم أنه غايبقى يحس بهذا التشجيع واخا غايحبس دابا ليريزو سوسيو.