كود سبور//

كشف الجنوب إفريقي رولاني موكوينا مدرب الوداد الرياضي، على الظروف اللي كايدوز فيها معسكر الفريق، أكد أنهم خدامين كايوجدو ففريق تنافسي للموسم الجاي، من خلال استراتيجية عمل غايبدلو من خلالها بزاف ديال الحوايج.

وفتصريح للموقع الرسمي للوداد الرياضي، قال رولاني موكوينا على هامش معسكر الفريق فابن سليمان: “حنا فالأسبوع الثاني من البرنامج ديالنا المستمر لمدة 5 السيمانات، ونواصل عملنا بهدوء باش نكونو فريق تنافسي وكنقدم بزاف ديال الشكر على العمل اللي كايتدار فالكواليس لكل من شارك فالانتدابات وأعضاء الطاقم التقني كاملين وخاصني نشكر الرئيس والإدارة حيث جابو شي لاعبين إلى الفريق وهذا الشي غايخلينا ندخلو الأسبوع الثاني من التداريب أفضل من البداية”.

وكمل موكوينا: “مازال قدامنا الخدمة بزاف وخاصنا نوجدو ريوسنا باش نكونو مزيانين وعندنا أهداف فكل أسبوع والانتقال إلى المرحلة التنافسية، واللي فيها غانلعبو ماتشات وديين بزاف، ونكسبو ظروف وشخصية ومنهجية اللعب وهذا الشي ماشي ساهل حيث خاصنا نبدلو شخصية الفريق ونخليو اللاعبين الجداد يدخلو فأسلوب اللعب اللي غايجيب لنا النجاح باش نخليو المشجعين ديالنا فرحانين”.