كود سبور//

عبر الجنوب إفريقي رولاني موكوينا مدرب الوداد الرياضي على الفرحة ديالو، بالرباح اللي حقق الفريق الأحمر على اولمبيك اسفي برسم الدورة 12 من البطولة الاحترافية، واكد ان المسفيويين عندهم فريق مزيان والماتش ضدهم كان صعيب ولكن عرفو كيفاش يربحوهم وشكر اللاعبين والجمهور.

وقال رولاني موكوينا فتصريح له بعد فوز الوداد على اولمبيك اسفي بواحد لزيرو البارح الجمعة: “فخور باللاعبين ديالي وكانبارك لهم الرباح، درنا مجهود كبير ضد فريق مزيان، راه تبعت أولمبيك اسفي ضد بزاف من فرق البطولة وعرفتهم فريق مزيان وعندهم لاعبين مزيانين، كان علينا امتصاص الضغط ديالهم ونخسرو لهم الهجمات ديالهم داكشي علاش لعبنا كرات طوال”.

وكمل موكوينا: “لعبنا مزيان وراني فخور باللاعبين ديالي وكانشكر الجمهور ديالنا على التحفيز ديالو التشجيع اللي كايشجعنا وكانفرح ماي كايبداو يغوتو “سير سير سير”، وبلا الجمهور ديالنا ما كناش نربحو”.