كود سبور//

قرر الجنوب إفريقي رولاني موكوينا مدرب الوداد الرياضي، يمشي بحالو من الوداد الرياضي، مع نهاية هذا الموسم الرياضي اللي خرج منو الفريق بزيرو لقب، وما غايمشي مع الواك لكاس العالم للأندية.

وأعلن روالاني موكوينا عبر تطبيق lenkedin الرحيل على الوداد وجاوب واحد من المتابعين ديالو اللي قاله الوقت وصل باش تمشي بحالك: “بالفعل راه أعلنت الرحيل ديالي فنهاية الموسم”.

ونايض الصداع على هشام ايت منا رئيس الوداد الرياضي بسبب التشبث بالمدرب رولاني موكوينا، حيث الفريق خرج معه بزيرو لقب هذا الموسم، فالوقت اللي ايت منا كايقول انه إلى ما جاش الفريق هو الثاني فالبطولة غايجري عليه، والإعلان ديال موكوينا الرحيل مع نهاية الموسم وبتلقائية غايسبب احراج لايت منا، حيث بان انه الرئيس ديال الوداد هو اللي متشبث بالمدرب وماشي المدرب اللي باغي يبقى.