كود سبور//
ما بقاش الجنوب أفريقي رولاني موكوينا باغي يهضر گاع لا على تحكيم ولا على حتى شي حاجة، بعدما خرجت العصبة الوطنية لكرة القدم الاحترافية ببلاغ انتقدت فيه التصريح ديالو ورا ماتش الواك وحسنية أكادير برسم منافسات البطولة الاحترافية، ملي احتج على التحكيم وعلى قرار السلطات بمنع الجماهير من حضور الماتشات، وقالت له براكا من تأجيج الجمهور.
ومن بعد ماتش الوداد الرياضي ضد شباب السوالم برسم منافسات كأس التميز، وجوابا على سؤال “شنو رأيك فالتحكيم؟” جاوب رولاني موكوينا وقال: “ما عندي حتى تعليق.. أنا متافق ومع الرؤية ديال السلطات وديال العصبة الاحترافية على تطويرهم الكورة، وأنا ما يمكنش نجي هنا نعطي آراء سلبية على البطولة المغربية وما بغيتش الناس يفهموني بشكل غالط”.
بلاغ العصبة الوطنية لكرة القدم الاحترافية تجاه كل من انتقد التحكيم او التسيير، كاين اللي شافو بمثابة سياسة لتكميم الأفواه، وكيمس بحرية التعبير، حيث ما فيها باس كل واحد يعبر على الرأي ديالو ما دام فيه احترام للأشخاص والقانون، وأن التصريحات ديال موكوينا اللي قالها ورا ماتش حسنية أكادير ما فيها حتى شي عيب، هو فقط احتج على التحكيم وطالب السلطات بأنها تلقى حل لمنع الجمهور من حضور الماتشات فبلاد مقبل على تنظيم كاس إفريقيا وكـس العالم.
موضوعات أخرى
وزارة التربية الوطنية غادي تدير التكوين للأساتذة فـ”الهيب هوب والبريكينگ”
