كود سبور//

هضر الجنوب إفريقي رولاني موكوينا مدرب الوداد الرياضي على مجموعة من الحوايج بعد ماتش الفريق الأحمر وشباب المحمدية برسم الدورة 6 من البطولة الاحترافية لكرة القدم، واللي سالا بنتيجة 3 لمصلحة الوداد وتصدر الفريق للبطولة الاحترافية.

وبعدما حقق الوداد الرياضي الرباح مع شباب المحمدية فتيران العربي الزاولي، قال رولاني موكوينا خلال الندوة الصحافية: “مزال خاص الخدمة فالوداد والمستوى غايتطور مع الوقت حتى نوصلو النيفو اللي بغينا وتابعينا ماتشات صعاب”.

وكمل مدرب الوداد وقال: “باغي نطور الدارجة ديالي باش نتواصل كثر مع اللاعبين ونمشي للبحر حيث المغرب فيه شواطئ واعرين وعندي شومبر فسونطر ويلنس باش نبقى خدام وقريب للفريق”.

وجاوب موكينا على شنو السبب اللي خلاه يبدل المدافع عبد المنعم بوطويل ضد شباب المحمدية وقال: “بوطويل مازال ما واجدش باش يلعب 90 دقيقة كاملة، ولكن التغيير ديالو ما كانش غير بدني ولكن كان حتى تكتيكي”.

وبخصوص بونا عمر، قال موكوينا: “الإصابة اللي عند بونا عمر ما منعاتوش من أنه يلعب مع المنتخب الموريتاني على عكس داكشي اللي بان لينا حنا هنا فالمغرب، ولكن ما دام أنه قدر يلعب مع المنتخب الموريتاني ما بقاش عندي أنا فين نقول أنه ما يقدرش يلعب مع الوداد، داكشي علاش كان خاص يلعب، وهذا الشي اللي وقع”.

أما على سيف الدين بوهرة قال موكوينا: “بوهرة قريب يكون واجد، هو دابا كايتريني وقريب نشوفوه، راني كانعرف الوداد واللاعبين اللي كانو فيه وعزيز عليا بوهرة كشخص وكلاعب فالتيران”.