وكالات//

شهدات مسابقة ملكة جمال “جراند إنترناسيونال 2025” فبانكوك واحد الموقف اللي كان مضحك ومحرج ف نفس الوقت، منين مشات ممثلة بنما، إيسامار هيريرا، للقدّام ديال الخشبة حيت ظنّات باللي تأهلات للمرحلة النهائية، ولكن من بعد تبيّن ليها أن المذيع كان كينادي على شي متسابقة أخرى.

إيسامار اللي عندها 31 عام، كانت فرحانة بزاف، كاتضحك ورافعة يدّيها من الفرحة، وتقدّمات للقدّام حيت كانت كتظن باللي سمعات سميتها. ولكن ف الحقيقة، المذيع قال: “مبروك لملكة جمال باراغواي”، وكان كيقصد المتسابقة سيثيليا روميرو، ماشي ممثلة بنما.

المذيع بقى ساكت شوية بعدما قال “مبروك لــ”، فاش إيسامار كانت باقا كتمشي بثقة نحو زميلاتها اللي تأهلو، ومن بعد صحح الموقف وقال بلطافة: “آه، سمحو ليا، أنا كنت كنقصد ملكة جمال باراغواي”.

وسرعان ما رجعات إيسامار لبلاصتها وهي كتضحك شوية، وبقات محافظة على الهدوء ديالها، والمذيع حاول يهدي الجو وقال إن القاعة عامرة بالمشجعين من بزاف ديال البلدان، وهادشي دار شوية ديال الصداع والخلط.

ورغم هاد الموقف اللي كان محرج، إيسامار خدات دعم كبير فمواقع التواصل، خصوصاً فحسابها فـ إنستغرام اللي متابعاه كثر من 21 ألف واحد. بزاف ديال الناس عبّرو على تعاطفهم معاها، واعتابرو اللي وقع مجرد “خطأ بسيط”، وحيّاوها على الطريقة الراقية اللي تعاملات بها مع الموقف.