وكالات//

تحوّل العرض اللي كانو الناس كيسناوه ديال أول روبوت بشري روسي لموقف محرج ومشهد كوميدي ما كانش مقصود، بعدما طاح الروبوت “AIDOL” فالرض قدّام الجميع فظهورو الأول فمعرض ديال التقنيات الحديثة فالعاصمة موسكو، وسط حضور إعلامي كبير.

وخلال هاد الفعالية، دخل الروبوت للمسرح على أنغام الموسيقى ديال فيلم “روكي” المعروفة، ومعاه جوج ديال الناس من فريق التطوير. حاول يحيّي الجمهور ويرفع يدو اليمنى، ولكن فقد التوازن ديالو فجأة وطاح على وجهو قدّام كاميرات الصحفيين، فمشهد اللي خلّى الحاضرين يضحكو وولّى مادة للسخرية فمواقع التواصل الاجتماعي، حسب ما نشرت صحيفة واشنطن بوست.

وسارعو المنظمين لسدّ الستار الأسود باش يغطّيو على الموقف، بينما فريق العمل حاول يخرّجو بسرعة من المسرح، والجمهور باقي كيصوّر وكيّوثّق اللحظة اللي تنتشرات بزاف من بعد فـالإنترنت.

وجدير بالذكر أن الروبوت “AIDOL” طوّراتو شركة روسية عندها نفس الاسم، ومسجّلة فغشت 2025. الطول ديالو 1.86 متر والوزن ديالو حوالي 95 كيلو، وكيقدر يعبّر على أكثر من 12 انفعال بشري، وقدرته يشد أوزان حتى لـ10 كيلو ويتحرك بسرعة تقارب 6 كيلومترات فساعة، حسب الموقع الرسمي ديال الشركة.