كود الرباط//

نزار بركة الأمين العام لحزب الاستقلال، داز قبل ساعات ف برنامج نكونو واضحين على قناة دوزيم، واللي مكانش فيه واضح وعطاها للغة الخشب والهروب من المسؤولية خصوصا وأنه شاد قطاع حساس مرتبط بالأمن المائي والغذائي للمغاربة وبالبنيات التحتية.

بركة ف بداية البرنامج، تهرب من المسؤولية الحكومية وزاد أكد بلي كاينا أزمة وسط التحالف الحكومي، بحيث قال لمقدم البرنامج: “أولا أنا هنا بصفتي أمين عام حزب الاستقلال وبغيت ف هاد الإطار بالنسبة لنا نقول إن الوقفات الاحتجاجية شيء إيجابي بالنسبة لبلادنا كيبين بلي كاين وعي ووطنية ووو”.

وأضاف بركة بالقول: “هي فرصة لنا نوضعو النقط على الحروف ونعرفو مكامن الخلال”.

دبا بركة أربع سنوات وهو فالحكومة ومزال محاطش نقط على الحروف ومزال معارفش مكامن الخلل، علا من كيضحك بركة حفيد سيدهم فالحزب علال الفاسي. وأصلا بقات غير 10 شهور للانتخابات. إمتى غادي يعرف مكامن الخلل.

هاد الموقف للي دار بركة “جبن سياسي” ومتحملش المسؤولية ديالو كوزير وكعضو ف الأغلبية الحكومية بما يقتضيه ذلك من تضامن وتنسيق وتعاون.

بركة عضو في الحكومة وكان عليه يكون شجاع ماشي يتخبا مور الحزب ويقول يا نجح يا نفشل.

فاش بداو كيهضرو على الماء قاليهم مستعد يعطي الحصيلة، أشمن حصيلة غاتقدم ومدير ديوانك “العجوز” والثقيل ف الخدمة كيتحكم ف دواليب الوزارة. دبا عاد انت عضو ف الحكومة، اما فيما يخص الاحتجاجات د الشباب انت كتهضر كزعيم حزب ماشي كعضو ف الحكومة.

بركة قال بلي دار مبادرة باش يسمعو للشباب من 11 يناير2025، لكن مصادر من حزب الاستقلال قالت لـ”گود” بلي الشباب كاع متجاوبوش مع هاد الجلسات د الاستماع بكون هاد الحزب بسبابو ناض الربيع العربي ف المغرب وكانت حكومة الاستقلال من الاسباب الرئيسية.

بركة كيقول بلي كيسمع للشباب بصفتو أمين عام حزب، ماشي بصفتو عضو ف الحكومة، يعني بالنسبة له الحكومة لا تسمع للشباب.

بركة لقا فرصة باش يصفي حساباتو مع خصومه ف الحكومة، ولقا هاد المسرحية للي دايرين ف الإعلام العمومي فرصة مزيانة باش يربح سياسيا ولو على ظهر المسؤولية والأخلاق السياسية للي كتفرض عليه يدافع على الحكومة حيث هو جزء اساسي فيها.