كود ـ القنيطرة//

أستاذة شابة فلتات من الموت ف واحد الحادث خطير قرب سوق أربعاء الغرب فإقليم القنيطرة، بعدما طاحت بها الطوموبيل فواحد القناة مائية عميقة من بعد ما فقدات السيطرة عليها وانحرفت بها بشكل مفاجئ.

وحسب المعطيات، الأستاذة عاشت لحظات صعيبة كلها خوق ورعب، وظنات فديك اللحظة أن نهايتها قربات، خصوصا بعدما بدات الطوموبيل كتهبط فالماء.

ولكن العناية الإلهية ما خيباتهاش، حيث تدخل شاب من ولاد المنطقة كان قريب من مكان الحادث، وما ترددش نهائيا باش ينقذها، بشجاعة، ونقز للماء وجر الأستاذة خارج الطوموبيل قبل ما تقع كارثة أكبر.

الناس فالمركز علقو على الموقف ديالو وعلى الشهامة اللي بين، واعتبروه عمل بطولي كيستحق كل الاحترام.